პრეზიდენტი, სალომე ზურაბიშვილი “უკრაინასკაია პრავდასთან” ინტერვიუში ამბობს, რომ რუსეთი საქართველოს ხელისუფლებისგან იღებს ორაზროვან სიგნალებს და ამოწმებს, რამდენად შორს შეუძლიათ წასვლა. ჟურნალისტმა ზურაბიშვილს ჰკითხა, რას ფიქრობდა, რა იქნებოდა შემდეგ ნებიჯი რუსეთთან კავშირების აღდგენის თვალსაზრისით. პრეზიდენტს, ასევე, ჰკითხეს გავრცელებულ ინფორმაციაზე, რომ შესაძლოა საქართველოსა და რუსეთს შორის სარკინიგზო მიმოსვლა აღდგეს.
“ვფიქრობ, ბევრი ჭორი ვრცელდება. ვფიქრობ, რომ ძირითადად რუსეთი გრძნობდა, რომ მანევრირების ადგილი არსებობს და ახლა იკვლევენ (ნიადაგს – რედ.) – ეს ძალიან ტიპიური რუსული ტაქტიკაა.
ისინი თქვენთან ომს აგებენ. ჩემი აზრით, უკვე ბევრი მიზეზით წააგეს – პოლიტიკური, ფსიქოლოგიური, საერთაშორისო. მათ სამხედრო თვალსაზრისით ჯერ არ წაუგიათ, მაგრამ ასე უნდა მოხდეს. ამ სიტუაციიდან სხვა გამოსავალი არ არსებობს.
ამის განცდით, ისინი ერთდროულად იღებენ რბილად რომ ვთქვათ, ორაზროვან სიგნალებს საქართველოს ხელისუფლებისგან. ახლა კი ისინი ამოწმებენ, რამდენად შორს შეუძლიათ წასვლა”, – თქვა ზურაბიშვილმა.
ზურაბიშვილი ამბობს, რომ რუსეთმა გამოსცადა ფრენები, ახლა შეიძლება სცადონ რკინიგზაზე. პრეზიდენტი ამბობს, რომ ასეთ პირობებში მნიშვნელოვანია საქართველომ აჩვენოს მისი გადაწყვეტილება.
