ევროკავშირის უმაღლესმა კომისარმა საგარეო პოლიტიკისა და უსაფრთხოების საკითხებში ფედერიკა მოგერინიმ უარყო დასავლურ მედიაში გავრცელებული ინფორმაცია, რომ მალტაში ჩამოვარდნილი თვითმფრინავის ბორტზე ევროკავშირის საზღვრების დაცვის სააგენტოს, Frontex-ის თანამშრომლები იმყოფებოდნენ. ამის შესახებ მოგერინიმ „ტვიტერ“-ის საკუთარ მიკრობლოგში განაცხადა.
როგორც ცოტა ხნის წინ გახდა ცნობილი, მალტაში თვითმფინავის ჩამოვარდნის შედეგად ბორტზე მყოფი ხუთივე ადამიანი დაიღუპა. სააგენტო Reuters-ი, წყაროზე დაყრდნობით იტყობინება, რომ ხუთივე დაღუპული ფრანგი სამხედრო მოსამსახურეა.
არსებული ინფორმაციით, თვითმფრინავი მალტის საერთაშორისო აეროპორტში აფრენიდან მალევე ჩამოვარდა. ოფიციალური ინფორმაციით, თვითმფრინავი ლიბიის ქალაქ მისრატაში მიემგზავრებოდა. მალტის საერთაშორისო აეროპორტი ამჟამად დაკეტილია.
