ჯამალ ხაშოგის მკვლელობიდან რამდენიმე დღეში საუდის არაბეთის საკონსულოში სტამბოლში საუდის არაბეთმა 11 კაციანი ჯგუფი გამოუშვა, რომელთაც მკვლელობის კვალის დაფარვა ევალებოდათ -ამის შესახებ თურქეთის მთავრობის წარმომადგენელმა “ბიბისის” განუცხადა.
მათი თქმით,ეს ფაქტი, იმაზე მიუთითებს, რომ საუდის არაბეთის ხელმძღვანელობამ მკვლელობის შესახებ იცოდა.
თურქული გამოცემა Sabah-ი წერს, რომ ერ-რიადიდან ჩამოსულ ჯგუფს შორის იყვნენ ქიმიკოსი და ტოქსიკოლოგი. გამოცემა მათ სახელებსაც ასაჯაროვებს – აჰმედ აბდულაზიზ ალ-ჯონაბი და ჰალედ იახია ალ-ზახრანი.
თურქეთი ირწმუნება, რომ ჯგუფის ამოცანა იყო მკვლელობის კვალის დაფარვა მანამდე, სანამ საუდის არაბეთის საკონსულოს შენობაში თურქი გამომძიებლები შევიდოდნენ. თურქული გამოცემის ინფორმაციით, კვალის დამფარავები საკონსულოში 12-დან 17 ოქტომბრამდე ყოველ დღე მუშაობდნენ.
საუდელი ჟურნალისტი ჯამალ ხაშოგი საუდის არაბეთის საკონსულოში 2 ოქტომბერს მოკლეს. ერ-რიადი ფაქტს არ აღიარებდა დაახლოებით სამი კვირა. თურქული გამოცემები ირწმუნებიან, რომ მკვლელობის უკან სამეფო ოჯახთან ახლოს მყოფი პირი დგას.
