ბორის ნემცოვის მკვლელობის მთავარი ფიგურები არ დაისჯებიან, განაცხადა მოკლული პოლიტიკოსის ქალიშვილმა ჟანნამ გერმანულ გაზეთ Bild am Sonntag-თან საუბრისას.
ბორის ნემცოვის უფროსმა ქალიშვილმა რუსეთის მთავრობა მამის მკვლელობის თანამონაწილეობაში დაადანაშაულა. „დარწმუნებული ვარ, რომ ეს შეკვეთილი მკვლელობაა“ განაცხადა მან გუშინ გერმანულ გამოცემასთან. ის ასევე დარწმუნებულია, რომ მკვლელობა მთავრობის სრული ხელშეწყობით მოხდა და რომ „შემსრულებლები დარწმუნებულები იყვნენ და არიან იმაში, რომ მათ არავინ დასჯის. ის მოკლეს იმიტომ, რომ კრემლის წინააღმდეგი იყო. ეს ცხადია“ – თქვა ნემცოვის ქალიშვილმა.
ამასთანავე ის დარწმუნებულია, რომ დანაშაული არ იქნება გამოძიებული: „ვიღაცას დასჯიან, მაგრამ ეს არ იქნება ის, ვინც სინამდვილეში ჩაიდინა“ – ხაზგასმით აღნიშნა მან. ნემცოვის ქალიშვილმა ასევე თქვა: „რუსეთში ვერ ვხედავ ოპოზიციონერ პოლიტიკოსებს. ოპოზიციამ საკუთარი ლიდერი დაკარგა.“
