ყველა პარტიას მუდმივად ტოვებენ წევრები და მუდმივად უერთდებიან, – ამის შესახებ თავდაცვის მინისტრმა თინათინ ხიდაშელმა იმ კითხვის საპასუხოდ განაცხადა, რომლის თანახმადაც, “რესპუბლიკური პარტიის” სენაკის ადგილობრივი ორგანიზაცია 25-მდე წევრმა დატოვა.
როგორც თინათინ ხიდაშელმა განაცხადა, სენაკის ორგანიზაცია გუშინ ორგანიზებულად არ დაუტოვებიათ, არამედ გარკვეული პერიოდის განმავლობაში – ორ-ორმა და თითო-თითომ. აღნიშნულს მინისტრმა ჩვეულებრივი პროცესი უწოდა.
”ყველა პარტიას მუდმივად ტოვებენ წევრები და მუდმიად უერთდებიან. ჩემთვის არ არის ცნობილი, რაიმე განსაკუთრებული ორგანიზებული ჯგუფური გასვლების შესახებ. შეიძლება ასეც მოხდეს, თუმცა არც ეს იქნება ტრაგედია. ყველა პარტიის წევრი ძვირფასია ჩვენთვის, საქართველოს ყველა მოქალაქე ძვირფასია ჩვენთვის, მაგრამ ადამიანებს საკუთარი არჩევანი აქვთ და საკუთარი სინდისის კარნახით იღებენ ამ გადაწყვეტილებებს. ასე რომ მე არავითარი პრობლემა არ მაქვს, როდესაც ადამიანი თავისუფალია, საკუთარი გადაწყვეტილების პირობებში იღებს რაიმე გადაწყვეტილებებს”, – განაცხადა ხიდაშელმა.
მისივე თქმით, სენაკის ორგანიზაცია გუშინ 20-მა წევრმა არ დატოვა, არამედ 25-მა ადამიანმა დატოვა, თუმცა ”გუშინ და ორგანიზებულად არ დაუტოვებიათ”. ”გარკვეული პერიოდის განმავლობაში ორ-ორმა, თითო-თითომ და ეს ჩვეულებრივი პროცესია. მე შემიძლია მოგიყვეთ იგივე პროცესი სხვა რაიონებში, ისევე, როგორც პირიქით, როდესაც უერთდებიან. ეს ძალიან ჩვეულებრივი პროცესია. არაფერთან არ გვაქვს საქმე და არ არის საჭირო ეს რაღაც შეთქმულების თეორიები”, – განაცხადა ხიდაშელმა.
