აშშ-ის ხელმძღვანელობით მოქმედმა საერთაშორისო კოალიციამ თურქეთში მდებარე ინჯირლიკის ავიაბაზიდან “ისლამური სახელმწიფოს” პოზიციებზე დარტყმები განაახლა. ამის შესახებ, “ფრანს პრესის” ცნობით, პენტაგონის ოფიციალურმა წარმომადგენელმა პიტერ კუკმა განაცხადა.
“თურქ მოკავშირებთან მჭიდრო კოორდინაციის შემდეგ, მათ გახსნეს თავისი საჰაერო სივრცე სამხედრო თვითმფრინავებისთვის. შედეგად ანტიტერორისტულმა კოალიციამ თურქეთის ბაზებიდან საჰაერო ოპერაცია განაახლა”, – განაცხადა პიტერ კუკმა. ამასთან, პენტაგონის წარმომადგენელმა აღნიშნა, რომ ინჯირლიკის ავიაბაზა კვლავ ენერგიის შიდა წყაროს გამოყენებით ფუნქციონირებს. ამერიკული მხარე იმედოვნებს, რომ ელექტროენერგიის მიწოდება ბაზაზე მალე აღდგება.
