„ეს ორი განსხვავებული ადამიანია. დარწმუნებული არ ვარ, დავუბრუნდები თუ არა მე ამ ადამიანს“, – ასე გამოეხმაურა ვოლოდიმირ ზელენსკი Bind-თან ინტერვიუს დროს, სოციალურ ქსელში გავრცელებულ მის ფოტოკოლაჟს.
უკრაინის პრეზიდენტის პირველი ფოტო რუსეთის უკრაინაში შეჭრამდეა გადაღებული, მეორე კი – ბუჩაში, ომის დაწყებიდან 41-ე დღეს.
Bind-ის ჟურნალისტმა, პოლ რონცჰაიმერმა ვოლოდიმირ ზელენსკის ჰკითხა, თუ რას ხედავდა იგი ღამით, დაძინებამდე.
„ვერაფერს ვხედავ. ძალიან მიჭირს დაძინება. არ მახსოვს ბოლოს კარგად როდის მეძინა“, – უპასუხა მან.
აღნიშნულმა გამოცემამ ასევე, ყურადღება გაამახვილა ვოლოდიმირ ზელენსკის გარეგნობის ცვლილებაზეც და აღნიშნა: „ყოველთვის მოღიმარი, პოზიტიური და ზოგჯერ სერიოზული, ვოლოდიმირ ზელენსკი ახლა ძალიან დაღლილად და შეშფოთებულად გამოიყურება”.
„უკვე თვეზე მეტია, იგი ყველაფერს აკეთებს იმისათვის, რომ რუსეთის მიერ გაჩაღებულ, საშინელ ომში უკრაინამ გაიმარჯვოს“, – წერს გამოცემა ინტერვიუში.