ვახუშტი მენაბდე – საარჩევნო რეფორმასთან დაკავშირებულმა სამუშაო ჯგუფმა ვერ მიაღწია მიზანს

საქართველოს ახალგაზრდა იურისტთა ასოციაცია დანანებით აღნიშნავს, რომ სამუშაო ჯგუფმა ვერ მიაღწია მიზანს, რაც მას დაუსახა მემორანდუმმა, რომელიც ხელისუფლებასა და „მოქალაქეებს“ შორის გაფორმდა, – ამის შესახებ ჟურნალისტებს ახალგაზრდა იურისტთა ასოციაციის წარმომადგენელმა ვახუშტი მენაბდემ საარჩევნო რეფორმასთან დაკავშირებული სამუშაო ჯგუფის შეხვედრის დაწყებამდე განუცხადა.

როგორც მენაბდე აცხადებს, პრობლემები, რომელიც საარჩევნო სისტემის, ადმინისტრაციის დაკომპლექტების და ამომრჩევლის ნების კონტროლის შემაკავებელი მექანიზმების მიმართულებით არსებობდა, ვერ აღმოიფხვრა.

„საქართველოს ახალგაზრდა იურისტთა ასოციაცია დანანებით აღნიშნავს, რომ სამუშაო ჯგუფმა ვერ მიაღწია მიზანს, რაც მას დაუსახა მემორანდუმმა, რომელიც ხელისუფლებასა და „მოქალაქეებს“ შორის გაფორმდა. ეს იყო ფუნდამენტური ცვლილებები საარჩევნო კანონმდებლობაში. სამი მიმართულება იყო ჩვენთვის და არა მარტო ჩვენთვის მნიშვნელოვანი – საარჩევნო სისტემა, ადმინისტრაციის დაკომპლექტება და ამომრჩევლის ნების კონტროლის შემაკავებელი მექანიზმები. სამივე ამ მიმართულებით არასაკმარისი ნაბიჯები გადაიდგა, რაც ნიშნავს იმას, რომ ეს პრობლემები, რაც არსებობდა ადმინისტრაციის ნდობის მიმართულებით, სამართლიანი საარჩევნო სისტემისა და ამომრჩევლის მიერ ნების თავისუფლად გამოვლენის მიმართულებით, ვერ მიიღწა და ვერ აღმოიფხვრა შემოთავაზებული ცვლილებებით.

ჩვენ მიგვაჩნია, რომ საარჩევნო ადმინისტრაცია უნდა დაკომპლექტდეს იმგვარად, სადაც გადაწყვეტილება ოპოზიციას და ხელისუფლებას შორის შეთანხმების საფუძველზე მიიღება, ანუ როდესაც იქნება გარანტია იმისა, რომ ვერცერთი მხარე შეთანხმების და კონსენსუსის გარეშე ვერ გადაქაჩავს ვერც ადმინისტრაციის დაკომპლექტებას და ვერც დაკომპლექტებულ ადმინისტრაციაში მათი წარმომადგენლების მიერ გადაწყვეტილების მიღების პროცესს. სამწუხაროდ, წარმოდგენილი პროექტი ამის შესაძლებლობას დიდწილად არ იძლევა“, – განაცხადა მენაბდემ.

მისივე განმარტებით, რამდენიმე ვერსია შეიძლება არსებობდეს, თუმცა, ერთი რასაც საია სთავაზობდა ჯგუფს იყო ის, რომ საარჩევნო ადმინისტრაცია დაკომპლექტებულიყო პროფესიულად, ამასთან, დაკომპლექტების პროცესში პრეზიდენტთან შექმნილიყო კომისია, რომელიც ქვეყნის პირველ პირს კანდიდატურებს წარუდგენდა.

„ამ კომისიაში შესულიყო თანაბრად ხელისუფლების და ოპოზიციის წარმომადგენლები. ისინი შეთანხმებულიყვნენ კანდიდატურებზე, რომელსაც წარუდგენდნენ პრეზიდენტს, პრეზიდენტი კი, თავის მხრივ, ამ კანდიდატურებს პარლამენტს წარუდგენდა. ასევე შეიძლება არსებობდეს მოდელი, სადაც იმ სურვილებს დავაკმაყოფილებთ, რომელიც პარტიებს აქვთ, თუმცა, გადაწყვეტილების მიღების პროცესი იქნება მაინც კონსენსუსზე ორიენტირებული“, – განაცხადა მენაბდემ.

ვირუსის ბლოკატორები
წინა სტატიაშიპარლამენტი საარჩევნო რეფორმასთან დაკავშირებულ კანონპროექტს ეუთო/ოდირში გაგზავნის
შემდეგი სტატიაგლდანში, კონსტანტინე ლესელიძის ქუჩაზე საგზაო სამუშაოები მიმდინარეობს