თუშეთის გზაზე, ეგრეთ წოდებული ,,თორღვას აბანოების“ მიმდებარე ტერიტორიაზე „ლენდკრუიზერის“ მარკის ავტომობილი დაახლოებით 60 მეტრის სიმაღლიდან ხრამში გადავარდა. ავტომობილით ისრაელის მოქალაქეები მგზავრობდნენ. ისინი თუშეთიდან ბარში ბრუნდებოდნენ. შემთხვევის შედეგად 5 და 10 წლის ბავშვები ადგილზე დაიღუპნენ, საავადმყოფოში არიან გადაყვანილები მათი მშობლები, ასევე 7 და 11 წლის ბავშვები.
თუშეთში, გამგებლის წარმომადგენლის, ლადო კახოიძის თქმით, ავტოსაგზაო შემთხვევის მიზეზი სავარაუდოდ ძლიერი ნისლი და უამინდობა გახდა.
,,ტურისტები იყვნენ თუშეთში დასათვალიერებლად და ბარში ბრუნდებოდნენ. ძლიერი ნისლი იყო, წვიმა და ჭექა-ქუხილი და ეტყობა, მძღოლმა, ამის გამო, გზა ვერ დაინახა და ავტომობილი, რომელშიც 4 მცირეწლოვანი ბავშვი იმყოფებოდა ხრამში გადავარდა. სამაშველო სამსახურის თანამშრომლებმა კარაგად იმუშავეს და 4 დაშავებულის ხრამიდან ამოყვანა დროულად შეძლეს. სამწუხაროთ 2 მცირეწლოვანი ბავშვი ადგილზე გარდაცვლილი იყო“,- აცხადებს ლადო კახოიძე.
მოხდართან დაკავშირებით აღძრულია სისხლის სამართლის საქმე 276-ე მუხლით, რაც ტრანსპორტის მოძრაობის და ექსპლოატაციის წესის დარღვევას გულისხმობს, რომელმაც ადამიანის სიცოცხლის მოსპობა გამოიწვია.
