საუდის არაბეთი არ გამორიცხავს საკუთარი სამხედროების სირიაში გაგზავნას -ამის შესახებ 17 აპრილს სამეფოს საგარეო საქმეთა მინისტრმა ადელ ალ-ჯუბეირმა გაეროს გენერალურ მდივანთან ანტონიუ გუტერიშთან ერთად გამართულ პრესკონფერენციაზე განაცხადა ერ-რიადში. საგარეო უწყების ხელმძღვანელის თქმით, მსგავსი გადაწყვეტილების მიღება შესაძლებელია იმ შემთხვევაში, თუკი შესაბამისი წინადადება გაიჟღერებს.
ცოტა ხნის წინ, გაზეთმა The Wall Street Journal (WSJ)-მა გაავრცელა, რომ დონალდ ტრამპის ადმინისტრაციას სირიაში მოკავშირეების სამხედრო კონტიგენტის ფორმირება სურს, რომელიც სირიაში მყოფ ამერიკელ სამხედროებს შეცვლის. გავრცელებული ინფორმაციით, მსგავსი წინადადებით ვაშინგტონმა მიმართა საუდის არაბეთს, კატარს და გაერთიანებულ საამიროებს.