რაქვიაშვილი – ორი დღეა, ოპოზიციონერ კოლეგებს ვეკითხები, რა უნდათ, რა პოზიცია უნდა ჩამოვაყალიბოთ და გაგვებუტნენ იმის ნაცვლად, რომ სერიოზული ლაპარაკი დაგვეწყო

ორი დღეა, ოპოზიციონერ კოლეგებს ვეკითხები, რა უნდათ, რა პოზიცია უნდა ჩამოვაყალიბოთ და გაგვებუტნენ იმის ნაცვლად, რომ ოპოზიციაში სერიოზული ლაპარაკი დაგვეწყო, – განაცხადა ოპოზიციონერმა დეპუტატმა სანდრო რაქვიაშვილმა ჟურნალისტებთან საუბრისას.

რაქვიაშვილის თქმით, პოლარიზაციის დასრულებას ნაცვლად, ერთმანეთის ლანძღვა გრძელდება.

„ჩვენს პოლიტიკურ სპექტრში დეპოლარიზაციის სურვილს საერთოდ ვერ ვხედავ. ორი დღეა, ჩვენს ოპოზიციონერ კოლეგებს ვეკითხები, რა უნდათ და რა პოზიცია უნდა ჩამოვაყალიბოთ, ჩვენ გაგვებუტნენ იმის ნაცვლად, რომ ოპოზიციაში სერიოზული ლაპარაკი მართლა დაგვეწყო. ამაზეც უარი თქვეს. „ქართული ოცნება“ პროცესს დეპოლარიზაციით იწყებს, არადა, საწინააღმდეგო მიმართულებით – საკონსტიტუციო ცვლილებებით უნდა დაიწყოს. ეს იქნებოდა ნდობის აღდგენისკენ გადადგმული ნაბიჯი, რაც მთელ პროცესს სერიოზულობას მისცემდა. არ მგონია, რომ ამ მომენტში საერთოდ რაიმეს სურვილი აქვთ ყველაზე მსხვილ მოთამაშეებს, რომ ეს პროცესი წარმატებით დასრულდეს. ამას რატომ აკეთებენ, არ ვიცი, მაგრამ ეჭვი მაქვს, რომ სულ რამდენიმე პოლიტიკოსი ვართ ევროინტეგრაცია მართლა გვინდა და რაღაცების დათმობა შეგვიძლია. სულ არ მახალისებს ევროკავშირის უამრავი რეგულაცია, მაგრამ თუ აღმოჩნდება, რომ ჩემი ხმა გადამწყვეტი იქნება, გენდერული კვოტის უაზრო წესს ხმას მივცემ. იგივე მზაობას ვერ ვხედავ ვერც მმართველ გუნდში და ვერც ოპოზიციაში. პირველ რიგში უნდა დავსხდეთ და მშვიდად და წყანარად ვილაპარაკოთ. ფორმალური ჯგუფები არ არის საჭირო, კომიტეტებში უნდა ვიმუშაოთ, საკონსტიტუციო ცვლილებები მივიღოთ. პოლარიზაცია მაშინ დასრულდება, თუ 11 რეფორმას ჩავატარებთ. თუ ამის შნო გვაქვს, ე.ი. პოლარიზაცია დასრულდება. ამის ნაცვლად, გრძელდება ერთმანეთის ლანძღვა“, – განაცხადა სანდრო რაქვიაშვილმა.

წინა სტატიაშიკანონის ფარგლებში ყველა პარტიას აქვს არსებობის უფლება – კალაძე “ალტ ინფოს” აკრძალვაზე
შემდეგი სტატიაივნისში ყველაზე მეტი ვიზიტორი რუსეთიდან შემოვიდა – ქვეყნების სტატისტიკა