პოლიციამ სამცხე-ჯავახეთსა და აჭარაში უკანონო ცეცხლსასროლი იარაღები და საბრძოლო მასალა ამოიღო – დაკავებულია 2 პირი

შინაგან საქმეთა სამინისტროს ინფორმაციით, სამცხე-ჯავახეთსა და აჭარაში უკანონო ცეცხლსასროლი იარაღები და საბრძოლო მასალა ამოიღეს. მომხდარზე ორი პირია დაკავებული.

პოლიციამ ადიგენის მუნიციპალიტეტში დააკავა თ.ღ., რომლის საცხოვრებელი სახლის ჩხრეკისას კალაშნიკოვის სისტემის “აკს”-ის მოდელის ავტომატი ამოიღეს.

რაც შეეხება მეორე პირს – 1989 წელს დაბადებულ, წარსულში ნასამართლევ რ.მ.-ს, ის ბათუმისს სამმართველოს თანამშრომლებმა ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით დააკავეს. პოლიციამ ნივთმტკიცების სახით “მაკაროვის” სისტემის ცეცხლსასროლი პისტოლეტი 2 მჭიდი და 14 საბრძოლო ვაზნა ამოიღო.

ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვისა და შეძენა-შენახვა-ტარების ფაქტებზე გამოძიება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს.

დანაშაულები 3-დან 7 წლამდე ვადით თავისუფლების აღკვეთას ითვალისწინებს.

წინა სტატიაში„ნაციონალური მოძრაობა“ 14 ოქტომბრის აქციაზე დასასწრებად რაიონებიდან მოსახლეობის ტრანსპორტირებას უზრუნველყოფს
შემდეგი სტატიაბათუმში მიხეილ სააკაშვილის მხარდამჭერთა ოფისი გაიხსნა