მთაწმინდაზე ხანძრის შედეგად დამწვარ 2 ჰექტარ ტერიტორიაზე გამწვანების სამუშაოები ოქტომბრის დასაწყისიდან დაიწყება.
როგორც თბილისის მერიის ეკოლოგიისა და გამწვანების საქალაქო სამსახურის უფროსი, გოგა წერეთელი აცხადებს, სპეციალისტების რეკომენდაციაა, აღნიშნულ ტერიტორიაზე სხვადასხვა ჯიშის, მათ შორის წიწვოვანი და ფოთლოვანი მცენარეები დაირგოს. ხანძრის შედეგად განადგურებული ტერიტორიის გამწვანების ინიციატივა კი კომპანია „მ2 უძრავი ქონება“ გამოთქვა.
„მთაწმინდაზე ხანძრის შემდეგ ტერიტორია გეოლოგებმა, ბოტანიკოსებმა და შესაბამისი სპეციალისტების წარმომადგენლებმა შეისწავლეს. გეოლოგიური დასკვნით ტერიტორიის რაიმე ეროზიული საშიშროება არ არსებობს. შესაბამისი დასკვნა გარემოს დაცვის სამინისტროს წარმომადგენლებმა დადეს. რაც შეეხება ტერიტორიის გამწვანებას, კომპანია „მ2“-მა შემოგვთავაზა, სპეციალისტებთან ერთად დაიგეგმოს აღნიშნული ტერიტორიის გამწვანება“, – განაცხადა წერეთელმა.
მისივე თქმით, კომპანია ნარგავების მოვლის ვალდებულებას 2 წლის განმავლობაში თავის თავზე აიღებს. ტერიტორიის გამწვანების პროცესი ოქტომბრის დასაწყისში დაიწყება.
მთაწმინდაზე ხანძარი 8 აგვისტოს გაჩნდა. ცეცხლი ძნელად მისადგომ ფერდობზე ბალახსა და ხეებს წაეკიდა და დაახლოებით 2 ჰექტარი ტერიტორია გაანადგურა. 200-მდე წიწვოვანი ხე დაიწვა.
