ჯანდაცვის მინისტრის მოადგილე: ნინოწმინდის პანსიონში 23 ბავშვი იმყოფება

ჯანდაცვის მინისტრის მოადგილის, თამარ ბარკალაიას განცხადებით, ამ ეტაპზე ნინოწმინდის ბავშვთა პანსიონში 23 ბავშვია დარჩენილი.

მისი განცხადებით, ნინოწმინდის პანსიონში იმყოფებიან სოციალური მუშაკები, როგორც უსაფრთხოების გარანტი.

„ადგილზე იმყოფებიან სოციალური მუშაკები, როგორც უსაფრთხოების გარანტი. ასევე, ჩვენ ვმუშაობთ ოჯახების მოძიებაზე, ოჯახების გაძლიერებაზე იმისთვის, რომ მოხდეს პირველ რიგში, ოჯახებში ინტეგრაცია და ეს პროცესი გრძელდება. ამ ეტაპზე 23 ბავშვი არის ნინოწმინდის პანსიონატში. დანარჩენების დიდი უმრავლესობა ოჯახებშია გაყვანილი“, – განაცხადა ბარკალაიამ.

მისი თქმით, საპატრიარქოში გამართულ დღევანდელ შეხვედრაზე საუბარი იყო იმის თაობაზე, რომ ბავშვების ინტერესები გათვალისწინებული უნდა იყოს.

„დღევანდელი შეხვედრის მიზანი პირველ რიგში იყო ის, რომ ამ პროცესში ჩართულმა ყველა პარტნიორმა დააფიქსიროს საკუთარი ხედვა და აზრი. ძალიან წარმატებული იყო ამ მიმართულებით შეხვედრა, რადგან როგორც საპატრიარქომ, ასევე სახელმწიფომ და ჩვენმა საერთაშორისო პარტნიორებმა ერთობლივად დავაფიქსირეთ, რომ მნიშვნელოვანია ბავშვის საუკეთესო ინტერესი და მათი უფლებების დაცვა. დღეს ჩვენ ქვეყანაში გვაქვს ბავშვთა უფლებათა კოდექსი, ოჯახის გაძლიერების პოლიტიკა, რომელიც მიმართულია დიდი ზომის ინსტიტუციების არარსებობაზე, ოჯახის გაძლიერებასა და ალტერნატიული ზრუნვის ფორმების ჩამოყალიბებაზე, რომელიც არის მინდობით აღზრდა, მცირე საოჯახო ტიპის სახლები. ამაზე ვისაუბრეთ არა მხოლოდ ნინოწმინდის კონტექსტში, არამედ ზოგადად, დიდი ინსტიტუციებისა და დიდი ბავშვთა სახლის კონტექსტში. შევთანხმდით, რომ დიდი ინსტიტუცია აღარ არის ქვეყნისთვის პრიორიტეტი და არ შეიძლება, რომ დიდი ინსტიტუცია იყოს წახალისებული. შესაბამსად, ჩვენ ერთად ასეთივე ფორმატით გავაგრძელებთ თანამშრომლობას, როგორც ნინოწმინდაში, ასევე სხვაგან, რომ დიდი ზომის ინსტიტუციებში ბავშვების შეფასება, მათ საუკეთესო ინტერესების გამოვლენა, მათი ოჯახეში ინტეგრაცია იყოს წახალისებული“,- განაცხადა ბარკალაიამ.

banner
წინა სტატიაში„ვორლდ ვიჟენ“:ყველა დიდი ზომის არარეგულირებული პანსიონი უნდა დაიხუროს
შემდეგი სტატიამომდევნო დღეების ამინდის პროგნოზი