გურჯაანის რაიონულ სასამართლოში „ერთიანი ნაციონალური მოძრაობის“ წევრის, დავით კირკიტაძისთვის აღკვეთის ღონისძიების შეფარდების საკითხზე სხდომა მიმდინარეობს.
სხდომას ესწრება თავად დაკავებული დავით კირკიტაძე.
„შინაგან საქმეთა სამინისტროს უნდობლობას ვუცხადებ. ის დაინტერესებული მხარეა, მაგრამ მზად ვარ, სასამართლოსთან ვითანამშრომლო“, – განაცხადა პროცესზე დავით კირკიტაძემ.
ბრალდების მხარე დავით კირკიტაძისთვის აღკვეთის ღონისძიების სახით პატიმრობის შეფარდებას ითხოვს.
სასამართლო პროცესის პარალელურად, გურჯაანში, სასამართლოსთან კირკიტაძის გათავისუფლების მოთხოვნით, გაერთიანებული ოპოზიციის საპროტესტო აქცია მიმდინარეობს.
„ნაციონალური მოძრაობის“ ერთ-ერთი ლიდერი, დავით კირკიტაძე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის, მოსამართლის განჩინებით, 17 დეკემბერს დააკავეს.
