ჟურნალისტების უფლება ჩვენს ქვეყანაში არის სრულად დაცული და თავისუფლება აბსოლუტური, – ასე უპასუხა შინაგან საქმეთა მინისტრმა, გიორგი გახარიამ „რუსთავი 2“-ის გადამღებ ჯგუფთან დაკავშირებულ ინციდენტზე ჟურნალისტის კითხვას.
„ამ საქმეს ავიყვანთ კონტროლზე და ეს იქნება კიდევ ერთი პრეცედენტი, მაგალითი, რომელიც კიდევ ერთხელ დაადასტურებს, რამდენად და რა ხარისხის თავისუფლება აქვს მუშაობის დროს ჟურნალისტს“, – განაცხადა შინაგან საქმეთა მინისტრმა.
„რუსთავი 2“-ის გადამღებ ჯგუფთან დაკავშირებულ ინციდენტზე შინაგან საქმეთა სამინისტრომ გამოძიება სისხლის სამართლის კოდექსის სამი მუხლით დაიწყო.
„რუსთავი 2“-ის გადამღები ჯგუფი მოძრაობის „არა ნაციზმს“ წევრებს პროფესიული საქმიანობისთვის ხელის შეშლაში ადანაშაულებენ.
