ევროკავშირის სადამკვირვებლო მისიას საქართველოში (EUMM) შეუძლია დაადასტუროს, რომ სოფელ ატოცის (ბალთას) ტერიტორიაზე 2018 წლის ნოემბრის დასაწყისიდან მიმდინარეობს ბორდერიზაციის ინტენსიური აქტივობები, – ამის შესახებ აღნიშნულია ევროკავშირის სადამკვირვებლო მისიის მიერ გავრცელებულ განცხადებაში.
EUMM-ი აღნიშნავს, რომ პატრულირების ჯგუფებმა „სამხრეთ ოსეთთან“ ადმინისტრაციული სასაზღვრო ხაზის გასწვრივ, დაახლოებით 400 მ-ის სიგრძის მონაკვეთზე ახალი ღობეების გავლებასთან დაკავშირებული სამუშაოები შენიშნეს.
„ევროკავშირი ყურადღებით ადევნებს თვალყურს და აწარმოებს ანგარიშგებას ბორდერიზაციის აქტივობების შესახებ, რომელიც გავლენას ახდენს სტაბილურობასა და აღნიშნულ ტერიტორიაზე მცხოვრები ადამიანების უფლებებზე. სამწუხაროდ, ასეთი ტიპის ინფრასტრუქტურა დამატებით დაბრკოლებებს უქმნის ადმინისტრაციული სასაზღვრო ხაზის ორივე მხარეს მცხოვრები ადგილობრივი მოსახლეობის გადაადგილების თავისუფლებას და სავარაუდოდ, მათ საარსებო გარემოსაც.
ბოლო რამდენიმე დღის განმავლობაში, აღნიშნულ საკითხთან დაკავშირებით კომუნიკაციის მიზნით, არაერთხელ ამოქმედდა ევროკავშირის სადამკვირვებლო მისიის მიერ მართული ცხელი ხაზი. ამ ხნის განმავლობაში, ევროკავშირის სადამკვირვებლო მისია უსაფრთხოების სფეროში მოქმედ შესაბამის პირებს მოუწოდებს, თავი აარიდონ ისეთ ქმედებებს, რომლებიც ხელს შეუწყობს დაძაბულობის მატებას.
ატოცში არსებული სიტუაცია ცხადყოფს ერგნეთში ინციდენტების პრევენციისა და მათზე რეაგირების მექანიზმის (IPRM) შეხვედრების აღდგენის განსაკუთრებულ მნიშვნელობას, სადაც მხარეებს შეუძლიათ, განიხილონ ისეთი საკითხები, რომლებიც გავლენას ახდენს სტაბილურობაზე. როგორც აღნიშნული პროცესის ერთ-ერთი ხელშემწყობი, ევროკავშირის სადამკვირვებლო მისია მოუწოდებს ერგნეთში ინციდენტების პრევენციისა და მათზე რეაგირების მექანიზმის ფორმატის უმოკლეს ვადებში აღდგენისკენ, რომელიც 2009 წლიდან ხელს უწყობს სტაბილურობისა და უსაფრთხოების შენარჩუნებას.
ევროკავშირის სადამკვირვებლო მისია, რომელიც ადგილზე ერთადერთი საერთაშორისო სადამკვირვებლო მისიაა, ყოველდღიურად, 24-საათიან რეჟიმში გააგრძელებს სიტუაციაზე დაკვირვებას. მისია თავისი მანდატის ფარგლებში განაგრძობს ევროკავშირის უწყებებისა და ევროკავშირის წევრი ქვეყნებისთვის ადგილზე არსებული ვითარების შესახებ უახლოესი, უტყუარი და დროული ინფორმაციის მიწოდებას“, – აღნიშნულია განცხადებაშ
