ცქიტიშვილი: კონსორციუმს წლის ბოლომდე ვუხანგრძლივებთ ვადას

თაიმერი timer.ge
ავტ.: თაიმერი timer.ge ოქტომბერი 16, 2019 01:06

ცქიტიშვილი: კონსორციუმს წლის ბოლომდე ვუხანგრძლივებთ ვადას

ივნისში „ანაკლიის განვითარების კონსორციუმს“ ვალდებულებების შესრულების ვადა წლის ბოლომდე გაუხანგრძლივდა, დღეს კი შუალედური ვადა ამოიწურა, – ამის შესახებ ტელეკომპანია „იმედის“ ეთერში, გადაცემაში „პირისპირ“ რეგიონული განვითარებისა და ინფრასტრუქტურის მინისტრმა მაია ცქიტიშვილმა განაცხადა.

„მიმდინარე წლის ივნისში ჩვენ მივიღეთ გადაწყვეტილება, რომლის საფუძველზეც „ანაკლიის განვითარების კონსორციუმს“ ვალდებულებების შესრულების ვადა 2019 წლის ბოლომდე გაუხანგრძლივდა. დღეს ამოიწურა შუალედური ვადა. ამ ვადის მთავარი ამოცანა იყო, რომ მისი დაცვის შემთხვევაში ჩვენ ერთობლივად გვექნებოდა იმის გარანტია, რომ ეს ვალდებულება წლის ბოლომდე ნამდვილად შესრულდებოდა. სამწუხაროდ, დღეს ეს ვალდებულება არათუ ნაწილობრივადაც არ შესრულდა, არამედ, სამწუხაროდ, კონსორციუმმა რაიმე სახის დოკუმენტაციის წარმოდგენაზე უარი მოვისმინეთ.

მთავრობამ ვადები 2017 წლის აგვისტოდან ჯერ 2017 წლის დეკემბრამდე, შემდეგ 2018 წლის დეკემბრამდე გაახანგრძლივა. 2018 წლის ბოლოდან ჩვენ დავიწყეთ სამმხრივი მოლაპარაკებები და ხელშეკრულება კიდევ 6 თვით, 2019 წლის ივნისში კი წლის ბოლომდე გახანგრძლივდა. მიუხედავად იმისა, რომ გვაქვს სრული უფლება, ხელშეკრულება დღესვე მოვშალოთ, ჩვენ მივცემთ კონსორციუმს იმის საშუალებს, რომ ბოლომდე ამოწუროს მისი რესურსი და 2019 წლის ბოლომდე მოიზიდოს როგორც საკუთარი კაპიტალი, ასევე 400-მილიონიანი სესხი.

სინამდვილეში, ამ პროექტს მთავრობის მხრიდან მხარდაჭერის გარდა არაფერი ჰქონია. კონსორციუმი აცხადებს, რომ ინვესტორების მოზიდვა ხაზარაძე-ჯაფარიძის საქმის გამო ვერ ხერხდება, თუმცა ეს არის მოგონილი მიზეზი, რომლითაც ისინი წარუმატებლობას ხსნიან. ამის თქმის საშუალებას მაძლევს ის ფაქტი, რომ გადავადება 2017 წლის აგვისტოდან ხდება, გამოძიების შესახებ კი ჩვენ მხოლოდ მიმდინარე წლის დასაწყისში გავიგეთ“, – განაცხადა ცქიტიშვილმა.

„ანაკლიის განვითარების კონსორციუმის” გენერალურმა დირექტორმა ლევან ახვლედიანმა და კონსორციუმის ორმა უცხოელმა წევრმა დღეს ბრიფინგი გამართეს. ლევან ახვლედიანის თქმით, იმის ნაცვლად, რომ მთავრობას ანაკლიის პროექტისთვის მხარდაჭერა გამოეცხადებინა, რამდენიმე მიმართულებით მისი საბოტაჟი განახორციელა. ახვლედიანი ასევე გამოეხმაურა ინფრასტრუქტურის მინისტრ მაია ცქიტიშვილის მოწოდებას და განაცხადა, რომ „ანაკლიის განვითარების კონსორციუმი“ სამინისტროსთვის გაგზავნილი წერილის გასაჯაროებას არ აპირებს.

მაია ცქიტიშვილის განცხადებით, ვალდებულებების შეუსრულებლობის შემთხვევაში, მთავრობას „ანაკლიის განვითარების კონსორციუმთან“ გაფორმებული საინვესტიციო ხელშეკრულების მოშლა შეუძლია.

იმის გათვალისწინებით, რომ ეს პროექტი არის ჩვენთვის მნიშვნელოვანი და რომ ჩვენ არც ერთ ოპონენტს, მათ შორის კონსორციუმს და არც პოლიტიკურ ოპოზიციას, ვერ მივცემთ იმის საშუალებას, რომ მთავრობას დააბრალონ რაიმე სახის ქმედება, რომელიც ხელს შეუშლის ანაკლიის განვითარების კონსორციუმს ამ პროექტის განხორციელებაში, ჩვენ არ ვისარგებლებთ ამ უფლებით და ჩვენ მივცემთ კონსორციუმს საშუალებას ბოლომდე ამოწუროს თავისი რესურსი და 2019 წლის ბოლომდე მოიზიდოს და მოიპოვოს როგორც საკუთარი კაპიტალი, ასევე საერთაშორისო ბანკებიდან სახსრები“, – განაცხადა მაია ცქიტიშვილმა.

ცქიტიშვილის თქმითვე, მიესალმება ინვესტორიების არსებობას, რომლის შესახებაც ანაკლიის განვითარების კონსორციუმის წარმომადგენლებმა განაცხადეს.

„ მე დღეს მოვისმინე კონსორციუმის სამეთვაყურეო საბჭოს ერთ-ერთი წევრის განცხადება, რომ 5 -6 ინვესტორი ჰყავს კონსორციუმს განხილვის რეჟიმში. ცხადია, მივესალმებით ინვესტორების არსებობას, სწორედ ამის გამო, არ შევწყვეტთ ამ ხელშეკრულებას და კონსორციუმს მივცემთ შესაძლებლობას და მის ინვესტორებს, რომ მიაღწიონ შეთანხმებებს იმისთვის, რომ ამ პროექტში მოიზიდონ საკუთარი კაპიტალი“, – აღნიშნა მინისტრმა.

თაიმერი timer.ge
ავტ.: თაიმერი timer.ge ოქტომბერი 16, 2019 01:06

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


12,476
ვიზიტორი
დღეში
Powered By Google Analytics