ამერიკული და დასავლური სადაზვერვო სამსახურების წარმომადგენლები თვლიან, რომ ომი უკრაინაში კიდევ ორი წელი მაინც გაგრძელდება. ამის შესახებ CNN იტყობინება დაზვერვის მონაცემებზე დაყრდნობით.
ზოგიერთი ამერიკელი და დასავლელი ოფიციალური პირი თვლის, რომ ბრძოლა შეიძლება გაგრძელდეს კიდევ ხუთი წლის განმავლობაში.
ამ მიზეზით, თეთრ სახლს სურს უზრუნველყოს დაფინანსება უკრაინის დახმარებისთვის ჯო ბაიდენის ვადის ამოწურვამდე. აშშ-ს ადმინისტრაციას, ნატოს ხელმძღვანელობას და კიევს ესმით, რომ თუ დონალდ ტრამპი გაიმარჯვებს, უკრაინის მხარდაჭერა შემცირდება, აღნიშნავს CNN.
ამერიკელი ოფიციალური პირის თქმით, უკრაინა გაძლიერებული ბრძოლების მოლოდინში 2024 წელს თავდაცვის ინდუსტრიის გასაძლიერებლად და არმიის აღსადგენად იმუშავებს.
ევროპაში დაფუძნებული ამერიკელი სამხედრო ოფიციალური პირი თვლის, რომ უკრაინა შეეცდება მეორე მსხვილ კონტრშეტევას ორ წელიწადში, რათა განდევნოს რუსული ჯარები მელიტოპოლიდან ზაპოროჟიეს რეგიონში.
CNN-ის ცნობით, ამერიკულ და დასავლურ სადაზვერვო სააგენტოებს არ სჯერათ, რომ წელს რომელიმე მხარე მნიშვნელოვან წარმატებას მიაღწევს.
Financial Times, უკრაინელ ოფიციალურ პირებზე დაყრდნობით, წერდა, რომ რუსული ჯარები სავარაუდოდ გეგმავენ ფართომასშტაბიან შეტევას უკრაინაში 2024 წლის ზაფხულში. კიევში თვლიან, რომ რუსეთი შეეცდება დაიკავოს უკრაინის ოთხი რეგიონის დარჩენილი ტერიტორიები, რომელთა ანექსია გამოაცხადა 2022 წლის სექტემბერში – დონეცკის, ლუგანსკის, ხერსონის და ზაპოროჟიეს ოლქები. ერთ-ერთმა დასავლელმა ოფიციალურმა პირმა FT-თან საუბარში აღნიშნა, რომ „2024 წელს რომელიმე მხარის ოპერატიული გარღვევის პერსპექტივები“ მცირეა.
