საქართველოში მიმდინარე წლის შემოდგომაზე ჩრდილოატლანტიკური საბჭოს მუდმივი სესია გაიმართება, – ამის შესახებ ჩაიწერა ვარშავაში, ნატო-ს სამიტის ფარგლებში ნატო-საქართველოს კომისიის სხდომაზე შემუშავებულ ერთობლივ განცხადებაში.
დოკუმენტში აღნიშნულია, რომ ნატო-საქართველოს კომისიის სხდომის მონაწილე მინისტრები მოუთმენლად ელოდებიან ჩრდილოატლანტიკური საბჭოს მუდმივი სესიის გამართვას, რომელიც ხაზს გაუსვამს საქართველოსადმი ნატო-ს პოლიტიკურ და პრაქტიკულ მხარდაჭერას და შექმნის საქართველოს მიერ მიღწეული პროგრესის შეფასების შესაძლებლობას.
ვარშავაში, ნატო-საქართველოს კომისიის სხდომაში ნატო-ს წევრი ქვეყნების საგარეო საქმეთა მინისტრები, ასევე ქართული დელეგაცია საქართველოს საგარეო საქმეთა მინისტრ მიხეილ ჯანელიძის ხელმძღვანელობით მონაწილეობდა.
საქართველოს საგარეო საქმეთა სამინისტროს ინფორმაციით, ეს იყო პირველი პრეცედენტი, როცა კომისიის სხდომა ნატო-ს სამიტის ფარგლებში გაიმართა.