მოდისა და ხელოვნების პოპულარულმა გერმანულმა ჟურნალმა PURPLEHAZE, რომელიც ახალგაზრდა თანამედროვე ხელოვნებისა და მოდის ინდუსტრიის წარმოჩენას და პოპულარიზაციას ემსახურება, ქართველი ფოტოგრაფის ბაკურ თვრინელის ედიტორიალის “Ultra-Marine” ვებვერსია გამოქვეყნა.
ჟურნალის, რომელის ბეჭვდური ვარიანტი 300 გვერდიანია და წელიწადში ორჯერ – გაზაფხულზე და შემოდგომაზე გამოდის „Bakur Tvrineli “Ultra-Marine”, art editorial“-ის ბეჭვდურ ვერსიას მსოფლიო სახელოვნებო წრეებს მაისის ბოლოს შესთავაზებს.
„ფოტოსერია “ულტრა-მარინი”- ბრიტანელი არტისტის ალექს ფოქსტონის მიერ შექმნილი ფერწერული ნამუშევრების ჩვენეული გარდაქმნაა. მხატვარი იკვლევს მამაკაცის სხეულს და უტრირებული ფორმებისა და პასტელური ფერების შერწყმით, რომლებიც ერთი შეხედვით ურთიერთსაპირისპიროა, ქმნის ახალ, უნიკალურ ვიზუალს. სწორედ მისი გამოსახვის ამ სტილმა აღგვაფრთოვანა და მოგვცა ბიძგი შეგვექმნა ფოტოსერია მის რამდენიმე ნამუშევარზე დაყრდნობით – ნახატების ამავე სახელწოდების სერიიდან “ულტრა-მარინი”. გმირების მელანქოლიური ხასიათი და მკვეთრი ფერთა გამა გახდა ჩვენთვის კვლევის საგანი“, – ამბობს ფოტოგრაფი ბაკურ თვრინელი.
ნამუშევრებში განსაკუთრებულ ყურადღებას იპყრობს ხასიათი და დეტალები, რომელიც უნისონშია ალექს ფოქსტონის ნამუშევრებთან.
„ვეცადეთ გვეპოვა ისეთი გარეგნობის მქონე რეალური ადამიანები, რომელთა დახმარებითაც ზუსტად გადმოვცემდით ალექს ფოქსტონის ნამუშევრებში არსებული გმირების ხასიათს. გრიმის ხელოვნებით, ფერთა კომბინაციით, სხვადასხვა სახის განათებითა და ჩვენი შტრიხების დამატებით მივედით ამ შედეგამდე“, – განუცხადა NATION-ს პროექტის დირექტორმა ელენე ბახტაძემ.
ელენე ბახტაძე განსაკუთრებულ ყურადღებას ამახვილებს ბაკურ თვრინელის ნამუშევრების მიმართ თავად ალექს ფოქსტონის დამოკიდებულებაზე.
„როდესაც მას ჩვენი ფოტოები გავუგზავნეთ დაძაბული ველოდოით პასუხს და ძალიან მოკლე დროში ვიღებთ მისგან შეტყობინებას: WOW! Thank you so much for this tribute.I’m truly touched. your attention to detail is amazing! Congratulations. It must have taken you hours to prepare each one. Thank you so much for sending this. All the very best. Alex. ეს ჩვენთვის ძალიან დიდი სტიმულია. ამის გაგრძელება გახლდათ თანამედროვე ხელოვნებისა და მოდის სფეროში მსოფლიოში აღიარებული გერმანული გამოცემის, PURPLEHAZE-ს დაინტერესება. მგონი ძალიან მნიშვნელოვანია, როდესაც სახელოვნებო ჟურნალი, რომელიც მსოფლიოში ვრცელდება და მის ყოველ ნომერს მოუთმენლად ელიან სპეციალისტები, ასეთ ყურადღებას უთმობს ქართველი ფოტოხელოვანის ნამუშევრებს. მადლობა ყველას ვინც პროექტში მონაწილეობდა და განსაკუთრებით ბაკურ თვრინელს, რომელმაც მართლაც ვირტუოზულად იმუშავა“, – განაცხადა ელენე ბახტაძე.
პროექტი: ULTRA-MARINE
Photography: Bakur Tvrineli @tvrineli
