საქართველო ჩადგა იმ ორი-სამი ავტორიტარული ქვეყნების რიგებში, როდესაც ხელისუფლება, სახელმწიფო ეწევა დეზინფორმაციას და საინფორმაციო ტერორს საკუთარი მოსახლეობის წინააღმდეგ, – ამის შესახებ „ნაციონალური მოძრაობის“ წევრმა, დეპუტატმა, რომან გოცირიძემ განაცხადა.
მისი თქმით, ამაზე საკმაოდ დიდი თანხა იხარჯება.
„ათეულ მილიონობით ფული იხარჯება დეზინფორმაციაზე. მილიონ ლარამდე რაზეც არის საუბარი, მხოლოდ და მხოლოდ ეს არ არის „ფეისბუქის“ გარკვეულ ნაწილში რეკლამისთვის დახარჯული ფული, მაგრამ რეკლამას მომზადება უნდა. აქ არის უამრავი სხვადასხვა ხარჯი – ტექნიკა, ხელფასები, მასალის მომზადება და სხვადასხვა მიმართულებით გავრცელება. რამდენიმე ათეული მილიონი ემსახურება ქვეყანაში საინფორმაციო კლიმატის მოწამვლას. ეს არის ძალიან საგანგაშო, ვინაიდან ეს კერძო ინიციატივები არ არის და ამის უკან დგას სახელმწიფო რესურსები, სახელმწიფოს ფული და სახელმწიფოს არაფორმალური მმართველი. ეს არის უმძიმესი საქართველოს, ქვეყნის პოლიტიკური იმიჯისთვის და ძალიან მძიმე დარტყმა საქართველოს ხელისუფლებისადმი. ნდობა ფაქტობრივად ნულამდე დადის. ასეთ ქმედებას არავინ პატიობს“, – განაცხადა რომან გოცირიძემ.
მისი თქმით, ეს აისახება საერთაშირისო თანამეგობრობის დამოკიდებულებაზე საქართველოს ხელისუფლების მიმართ.
„სამწუხაროდ, ეს საქართველოზეც აისახება, ვინაიდან იმიჯგაფუჭებულ ქვეყანაში ფული არ შემოვა. არ არის გამორიცხული სანქციებზეც იფიქრონ“, – განაცხადა რომან გოცირიძემ.
