ხელვაჩაურის მუნიციპალიტეტში გარდაცვლილი ანრი გოგიტიძის ოჯახის წევრები, საქმის კვალიფიციას არ ეთანხმებიან და აცხადებენ, რომ 14 წლის მოზარდი თანატოლებმა ცემით მოკლეს.
გარდაცვლილის დეიდის ინფორმაციით, 14 წლის მოზარდი 16:00 საათზე, საცხოვრებელი კორპუსის სადარბაზოში მოკლეს.
„საფეთქელთან აქვს დაზიანება, ასევე – კეფაზე. ჩემი დისშვილი ბავშვებმა ნახეს სადარბაზოს მეორე სართულზე, ჩემს დას დაუძახეს. მან მაშინვე წაიყვანა საავადმყოფოში, მაგრამ ბავშვი გზაში გარდაიცვალა“, – განაცხადა გარდაცვლილი მოზარდის დეიდამ.
26 მარტს ხელვაჩაურში, დაბა შარაბიძეებში 14 წლის მოზარდი გარდაიცვალა. შს სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
უწყების ცნობით, პირველადი მონაცემებით, ცხედარს არ აღენიშნება დაზიანებები. თუ გამოძიების პროცესში რაიმე გამოიკვეთება, შესაბამისად, მუხლი გადაკვალიფიცირდება.
