დეპუტატ ვალერი გელაშვილის ცემის საქმეზე ყოფილი პრემიერ-მინისტრი ვანო მერაბიშვილი, საქართველოს შინაგან საქმეთა სამინისტროს სპეციალური ოპერატიული დეპარტამენტის ყოფილი ხელმძღვანელი ერეკლე კოდუა და სოდ-ის კიდევ ერთი ყოფილი მაღალჩინოსანი გია სირაძე სასამართლომ დამნაშავედ სცნო.
ორ წლიანი განხილვების შემდეგ, მოსამართლე დავით მგელიაშვილმა დღეს გამამტყუნებელი განაჩენი გამოაცხადა.
მერაბიშვილს 6 წელი და 9 თვე, კოდუას და სირაძეს კი 9 წლით თავისუფლების აღკვეთა მიესაჯათ.
საქართველოს პარლამენტის წევრ ვალერი გელაშვილზე 2005 წელს მომხდარი შეიარაღებული თავდასხმის და მისი ცემის საქმეზე, საქართველოს ყოფილ პრეზიდენტს მიხეილ სააკაშვილს, შინაგან საქმეთა ყოფილ მინისტრს ივანე მერაბიშვილს, სოდ-ის ხელმძღვანელ ერეკლე კოდუას და კიდევ ერთ მაღალჩინოსანს გია სირაძეს 2014 წელს ბრალი წაუყენეს.
ვალერი გელაშვილის ცემის ფაქტზე მიხეილ სააკაშვილის ბრალეულობის საკითხი სასამართლოში ცალკე განიხილება.
