უკრაინული მედია წერს, რომ მსოფლიოს მედიასაშუალებები კახოვკის ჰიდროელექტროსადგურის აფეთქებაში დამნაშავეს არ ასახელებენ.
უკრაინული მედიის ინფორმაციით, გერმანულმა გამოცემა „ბილდმა“ სტატიის სათაურიდან რუსეთი ამოიღო. როგორც მედია წერს, „ბილდის“ ორიგინალურ სათაურში ეწერა: „რუსებმა უკრაინაში უზარმაზარი კაშხალი ააფეთქეს“, რედაქტირების შემდეგ სათაური შემდეგნაირად შეიცვალა – „უკრაინაში უზარმაზარი კაშხალი აფეთქდა“.
მედია იუწყება, რომ მსგავსი სათაური გაჩნდა საინფორმაციო სააგენტო „როიტერის“ მთავარ გვერდზე, სადაც ნათქვამია – „უკრაინის სამხრეთში ყირიმის წყლით მომმარაგებელი კაშხალი ააფეთქეს“.
უკრაინული მედიის ინფორმაციით, აგრესორი სახელმწიფოს ბრალი კაშხლის დანგრევაში არც „ნიუ იორკ თაიმსის“ სტატიაში იყო ნახსენები. „მნიშვნელოვანი კაშხალი განადგურდა ფრონტის ხაზზე სამხრეთ უკრაინაში“, – ვკითხულობთ სათაურში, ხოლო ქვესათაურში განმარტებულია, რომ უკრაინის პრეზიდენტმა, ვოლოდიმირ ზელენსკიმ ტერაქტში რუსეთი დაადანაშაულა.
