თვითონ ის ადამიანი არ ესწრებოდა თათბირს, საიდანაც გავრცელდა ინფორმაცია ყალბი პირადობის მოწმობების დაბეჭდვის შესახებ, – ამის შესახებ ჟურნალისტებს არასამთავრობო ორგანიზაცია „სამართლიანი არჩევნების” აღმასრულებელმა დირექტორმა მიხეილ ბენიძემ განუცხადა.
მისი თქმით, წყარო ასევე არ ესწრებოდა, სავარაუდოდ, ყალბი პირადობების ბეჭდვის პროცესს, რის გამოც მას კონკრეტული მტკიცებულებები არ აქვს.
როგორც ბენიძემ აღნიშნა, წყარომ აღნიშნული ინფორმაცია იუსტიციის სამინისტროში ჩატარებული თათბირის შემდეგ გაიგო, თუმცა მტკიცებით ფორმაში ვერ საუბრობს, ამ თათბირზე მოხდა თუ არა ამ საკითხის განხილვა. მისივე განცხადებით, ის აპირებს მის ხელთ არსებული ყველა ინფორმაციის გამოძიებისთვის მიწოდებას, რათა გამოძიებამ დაადგინოს ჭეშმარიტება.
„ვაპირებ იმ ინფორმაციის მიწოდებას, რაც გავრცელებულია ჩვენს განცხადებაში. ჩვენ ზოგადად რაიმე სხვა, საიდუმლო ინფორმაციებს არ ვფლობთ. ჩვენი მანდატიდან გამომდინარე ვსაუბრობთ იმ ფაქტებზე საჯაროდ, რაც ჩვენთვის ხდება ცნობილი. თვითონ ეს ადამიანი არ ესწრებოდა იმ თათბირს, საიდანაც გავრცელდა ინფორმაცია ყალბი პირადობების დაბეჭდვის შესახებ, მან ეს გაიგო, ეს ინფორმაცია გამოვიდა ამ თათბირიდან. მე რამდენადაც ვხვდები, წყარო არ შესწრებია უშუალოდ დაბეჭდვის ფაქტს, ამიტომ არ აქვს ფოტო ან ვიდეო მტკიცებულება“, – განაცხადა მიხეილ ბენიძემ.
არასამთავრობო ორგანიზაციები სამართალდამცავ ორგანოებს მიმართავენ და არჩევნების სავარაუდო გაყალბების ფაქტით დაინტერესებისკენ მოუწოდებენ.
არასამთავრობო ორგანიზაციებმა – „საქართველოს ახალგაზრდა იურისტთა ასოციაციამ“, „საერთაშორისო გამჭირვალობა – საქართველომ“ და „სამართლიანმა არჩევნებმა“ პრესკონფერენცია გამართეს, სადაც მათ არჩევნების შესაძლო გაყალბების სქემასა და უკანონოდ ყალბი დოკუმენტაციის დამზადებასთან დაკავშირებით ისაუბრეს. აღნიშნულთან დაკავშირებით პროკურატურამ გამოძიება დაიწყო.
