სასამართლომ ტურისტული კომპანიის დირექტორი და მიკროავტობუსის მესაკუთრე დამნაშავედ ცნო

საქართველოს პროკურატურის ინფორმაციით, 2020 წელს, შატილში მომხდარი ავტოსაგზაო შემთხვევის საქმეზე, მცხეთის რაიონულმა სასამართლომ ბრალდების მხარის მტკიცებულებები გაიზიარა და ტურისტული კომპანიის დირექტორი და მიკროავტობუსის მესაკუთრე დამნაშავედ ცნო.

მიკროავტობუსის მესაკუთრეს 7 წლიანი, ხოლო ტურისტული კომპანიის დირექტორს 3 წლიანი პატიმრობა შეუფარდა:

“პროკურატურის მიერ სასამართლო პროცესზე გამოკვლეული მტკიცებულებებით დადასტურდა, რომ 2020 წლის 23 აგვისტოს ტურისტული სააგენტოს – შპს „ჩიფ თრეველ ჯორჯიას“ მიერ ორგანიზებული ტურისტული მარშრუტით, შატილიდან თბილისში დაბრუნებისას, სატრანსპორტო საშუალების გაუმართაობის მიზეზით, მიკროავტობუსი შატილის გზაზე 60 მეტრის სიღრმის ხევში ჩავარდა, რის შედეგადაც 17 პირი გარდაიცვალა, მათ შორის, მიკროავტობუსის მძღოლი; ხოლო სამმა მოქალაქემ სიცოცხლისთვის სახიფათო, მძიმე ხარისხის დაზიანება მიიღო.

სამართალდამცველებმა ბრალდებულები 2020 წლის 23 თებერვალს სასამართლოს განჩინების საფუძველზე დააკავეს. მათ ბრალდება საქართველოს სისხლის სამართლის კოდექსის 277-ე მუხლის პირველი და მესამე ნაწილებით წარედგინათ

მცხეთის რაიონულმა სასამართლომ მიკროავტობუსის მესაკუთრე სრულად ცნო დამნაშავედ წარდგენილ ბრალდებაში (ტექნიკურად გაუმართავი ტრანსპორტის საექსპლუატაციოდ გაშვება, რამაც ადამიანების სიცოცხლის მოსპობა და ჯანმრთელობის მძიმე დაზიანება გამოიწვია) და სასჯელის სახედ და ზომად 7 წლით თავისუფლების აღკვეთა შეუფარდა.

ტურისტული კომპანიის დირექტორი სასამართლოს მიერ დამნაშავედ იქნა ცნობილი 220 პრიმა მუხლის მეორე ნაწილით (გულგრილობა, სამსახურებრივი მოვალეობის შეუსრულებლობა ან არაჯეროვნად შესრულება მისდამი დაუდევარი დამოკიდებულების გამო, რამაც ადამიანების სიცოცხლის მოსპობა ან სხვა მძიმე შედეგი გამოიწვია) და სასჯელის სახედ და ზომად 3 წლით თავისუფლების აღკვეთა განესაზღვრა.” ნათქვამია პროკურატურის ინფორმაციაში.

ავტოსაგზაო შემთხვევა შატილში 2020 წლის 23 აგვისტოს მოხდა. დაიღუპა 17 ადამიანი.

წინა სტატიაშიინსბრუკში 114 000 ლარი იქნა გადახდილი მიხეილ სააკაშვილისა და გიგი უგულავას გასახდომ პროცედურაში
შემდეგი სტატიამიხეილ სააკაშვილი: 3 დღეა თითქმის არ ავმდგარვარ საწოლიდან და თქვენი ასეთი მძლავრი სოლიდარობის აქციის შემყურეს ისეთი ენერგია მომეცა, რომ საკანში ადგილს ვერ ვპოულობ