საქართველოს სტატისტიკის ეროვნულმა სამსახურმა, 2021 წლის თებერვლის ეკონომიკური ზრდის წინასწარი შეფასება გამოაქვეყნა. მონაცემების მიხედვით, თებერვლის რეალური მშპ წინა წლის შესაბამის პერიოდთან შედარებით 5.1%-ით შემცირდა.
იანვრის ეკონომიკური ვარდნა 11.5% იყო, შესაბამისად იანვარ-თებერვლის საშუალო ვარდნა 8.3%-ია.
საქსტატის მიხედვით, 2021 წლის თებერვალში, წინა წლის შესაბამის პერიოდთან შედარებით კლება შეინიშნებოდა ისეთ საქმიანობებში, როგორიცაა: მშენებლობა, განთავსების საშუალებით უზრუნველყოფა, ხელოვნება, გართობა და დასვენება, ტრანსპორტი და დასაწყობება, უძრავ ქონებასთან დაკავშირებული საქმიანობები და დამამუშავებელი მრეწველობა.
ზრდა დაფიქსირდა საფინანსო და სადაზღვევო საქმიანობების, ვაჭრობის, წყალმომარაგების, კანალიზაციისა და ნარჩენების მართვის სექტორებში.
