„ევროპული საქართველოს“ წევრი აკაკი ბობოხიძე აცხადებს, რომ საოჯახო სასტუმროების ქსელში ჩართულ პირებს წყლის ტარიფი შესაძლოა, 13-ჯერ გაუძვირდეთ. ამის შესახებ მან დღეს გამართულ ბრიფინგზე განაცხადა. მან სემეკ-ს მოუწოდა, საოჯახო ტიპის სასტუმროებისთვის წყლის ტარიფის გაზრდა არ დაუშვას.
„სემეკ-ში დაყენებული მოთხოვნა, რომ საოჯახო სასტუმროები განხილული იყოს, როგორც კომერციული ობიექტები და მათ დაუწესდეთ წყლის ტარიფი არასაყოფაცხოვრებო წესით, დაკმაყოფილების შემთხვევაში გამოიწევს კატასტროფულ შედეგებს ამ სფეროში, ამ ადამიანებს წყლის ტარიფი გაუძვირდებათ 13-ჯერ, ხოლო თუ ეს პრეცედენტი დაშვებული იქნება თბილისში, არ გამოვრიცხავ, რომ მსგავსი ტიპის მოთხოვნები დადგეს სრულიად საქართველოს მასშტაბით“, – განაცხადა აკაკი ბობოხიძემ.
სემეკ-ში საკითხთან დაკავშირებით სატელევიზიო კომენტარს არ აკეთებენ, თუმცა განმარტავენ, რომ კომერციული ტარიფის დაწესება არ იგეგმება, მხოლოდ საუბარია ჰიბრიდულ ტარიფზე, რომელზეც მსჯელობა იანვარში დაიწყო და აპრილის შუა რიცხვებამდე გადაწყვეტილება არ იქნება მიღებული.
