„თაიმერის“ წყაროს ინფორმაციით, რამდენიმედღიანი წვალების და ფიქრის შემდეგ მამუკა ბახტაძემ გადაწყვეტილება მიიღო: სამეგრელო-ზემო სვანეთის გუბერნატორის პოსტს ვასილ ხორავა დაიკავებს, ხოლო მისი მარჯვენა ხელი, როგორც ყველგან, სადაც კი იყო ხორავა, აქაც თორნიკე კიზირია იქნება. ხორავა და კიზირია „ბავშვობიდან“ ერთად იკეთებენ კარიერას. სადაც არის ხორავა, კიზირიაც იქაა და პირიქით.
„სინათლის ქალაქში“ კიზირია ხორავასთან მოადგილედ იყო. ეს უკანასკნელი რკინიგზაში რომ წავიდა, იგი კიზირიამ შეცვალა, შემდეგ კიზირია რკინიგზასაც „მოელანდა“. ნებისმიერ რკინიგზელს რომ შეეკითხოთ ხორავას ან კიზირიას შესახებ, გვერწმუნეთ, დადებითს არაფერს იტყვის. აი ეს ხალხი არის ივანიშვილის მიერ ნაქები „ახალგაზრდა, წარმატებული ეკონომისტის“ მამუკა ბახტაძის საკადრო პოლიტიკის კიდევ ერთი კრახი.
ძალიან „ნიჭიერი“ უნდა იყო, რომ რამდენიმე თვეში იმდენი შეცდომა დაუშვა, რამდენიც ბახტაძემ „მოახერხა“ , ხოლო ვიდრე სამეგრელო-ზემო სვანეთის მომავალი მმართველის კარიერული წინსვლის ბურუსით მოცულ შტრიხებს გაგაცნობთ, მოგახსენებთ, რომ რკინიგზელებმა იციან იმ ცუდი ურთიერთობის შესახებ, რომელიც ხორავასა და ბახტაძეს შორის არსებობდა და რომ ბახტაძე ხორავას მისი საქმეების გამო კარგი თვალით არ უყურებდა, მაგრამ ვერ იშორებდა, რამეთუ ხორავას „კრიშა“ ჰყავდა“. ამ საკადრო პოლიტიკამ კი ეს მითი დაამსხვრია…
დავიწყოთ იმით, რომ ვასილ ხორავა, არაერთ სკანდალშია გახვეული და როგორც ხორავასგან დაზარალებულები აცხადებენ, ის „არის თაღლითი“. საქმე, რომელშიც ხორავა ფიგურირებს დაიწყო საქართველოს ფარგლებს გარეთ, დემოკრატიისა და თავისუფლების აკვანში – ამერიკაში და საქართველოში დასრულდა.
დეტალებში უკეთ გარკვევისათვის გთავაზობთ მასალას არქივიდან (სტილი დაცულია):
„2013 წლის ივნისში ჩემმა მეუღლემ, ჩვენს ვაჟსა და თავის და–ძმასთან ერთად, საქართველოში გამომგზავრება გადაწყვიტა. როგორც წესი, მე ჩემი აგენტი მყავს, რომელიც ოფიციალურად დარეგისტრირებულ კომპანიაში მუშაობს და თვითმფრინავის ბილეთებს შეღავათიან ფასში შოულობს, მაგრამ ამჯერად ჩემი ოჯახის წევრებმა მითხრეს, რომ ნიუ-იორკში ერთ–ერთი ქართველი, კერძოდ, ვასილ ხორავა ბილეთებს 1.000 დოლარად ჰყიდდა. არადა, 1.400-დან 1.600 დოლარამდე ვიხდით ხოლმე. რა თქმა უნდა, ასეთმა ფასმა მეც მომხიბლა და ვასილ ხორავას ოთხი ბილეთის საფასური გადავუხადე. მან 2-3 დღეში გამომიგზავნა მისამართი, რომელზეც ელექტრონული ბილეთები იყო განთავსებული და ზედ ჩემი ოჯახის წევრების სახელები ეწერა, ქვემოთ ავიაკომპანიის ლინკი იყო მითითებული, შევედი ამ ლინკზე და ვნახე, რომ ბილეთები ოფიციალურად დარეგისტრირებული არ იყო. დავრეკე აღნიშნულ კომპანია “დელტაში” და აღმოჩნდა, რომ ბილეთებში, რომელიც ხორავამ ჩვენს სახელზე გამოგზავნა, ფული არ იყო გადახდილი. ანუ, ოფიციალურად დამტკიცებული არ იყო. ჩემი მეუღლის დამ მაშინვე ვასილ ხორავას გადაურეკა. მან კი უთხრა, რომ რაღაც გაუგებრობა მოხდა და ბილეთებს ხელახლა გამოგზავნიდა, თუმცა ხელმეორედ გამოგზავნილი ბილეთების გადამოწმებისასაც იგივე მითხრეს – ბილეთების შესაძენად ფული არავის გადაურიცხავს. ამასობაში გაფრენის დრო მოახლოვდა და დაგვიანების გამო, ბილეთები საკმაოდ ძვირად ვიყიდეთ. ხორავასთან დაკავშირებას ვცდილობდით, მაგრამ უშედეგოდ, ზარებს არ პასუხობდა. თუმცა მოგვიანებით მოგვწერა, რომ ის ერთ–ერთ უკრაინულ კომპანიაში მუშაობდა, რომელიც გაკოტრდა, ფული “მოტეხა” და ისიც სხვა თანამშრომლებივით შარში გახვია. ამ უკრაინული კომპანიის კვალს ვერსად მივაგენით. საქმე ისაა, რომ ეს იყო დიდი თაღლითური სქემა. არ ვიცი საქართველოში რამდენად გაშუქდა ეს ამბავი, მაგრამ სწორედ იმ დროს ამერიკაში მოქმედი უკრაინულ-რუსული დანაშაულებრივი დაჯგუფება დააკავეს, რომლის წევრებიც კორპორაციულ საკრედიტო ბარათებს იპარავდნენ და შემდეგ ყიდდნენ. დანაშაულებრივი დაჯგუფების დაკავების შემდეგ. ეს სქემა გაიშიფრა და, როგორც ჩანს, ყველა ბარათი დაბლოკეს, მათ შორის ალბათ, ვასილ ხორავასიც. თანაც შეუძლებელი იყო ხორავას არ სცოდნოდა, რომ ის მოპარული საკრედიტო ბარათით სარგებლობდა. მთლიანად ხორავასთვის 4.400 დოლარამდე მქონდა გადახდილი და აქედან მხოლოდ 2.200 დააბრუნა. მე პირადად ქალაქ ბრიჯვოტარში ვცხოვრობ. იქვე ახლოს, ქალაქ მემვილთან, ქართული ეკლესიაა, სადაც ქართველები ვიკრიბებით ხოლმე. სწორედ იქ აღმოვაჩინეთ ერთმანეთთან საუბრისას, რომ ხორავას მსხვერპლი 50-მდე ადამიანი ვიყავით. შესაძლოა, უფრო მეტიც. აქედან თანხა მთლიანად მხოლოდ ოთხს დაუბრუნა,“ – აცხადებს ერთ-ერთი დაზარალებული რევაზ გარიშვილი.“
როდესაც ეს აფიორა გახმაურდა, ამ დროს ვასილ ხორავა აფხაზეთის მთავრობის ფინანსთა მინისტრი იყო. როცა მას ჟურნალისტებმა კომენტარი სთხოვეს, ხორავამ „ხელები დაიბანა“ და თითი ვინმე ირაკლი შაიშმელაშვილისაკენ გაიშვირა. ამ სკანდალმა ხელი არ შეუშალა ხორავას წინსვლას, ის მალევე თბილისის მერიაში დაასაქმეს და ქალაქის განათება ჩააბარეს. „სინათლის ქალაქის“ შემდეგ ხორავა რკინიგზაში გადადის და ინფრასტრუქტურის დეპარტამენტს ხელმძღვანელობს. ხორავა რკინიგზაშიც ვერ გაექცა სკანდალს, მისი იქ მისვლიდან ცოტა ხანში უგზოუკვლოდ „იკარგება“ დიდი რაოდენობის სპილენძი. გამოძიება დაწყებულია, მაგრამ, როგორც ამბობენ „თაროზე ობდება“. არც ხორავასთვის და არც მისი მარჯვენა ხელის – კიზირიასთვის, დღემდე პასუხი არავის მოუთხოვია. აი, ასეთ ხალხზე აკეთებს გათვლას ბახტაძე და ამ ხალხის მეშვეობით აპირებს სამეგრელო-ზემო სვანეთის აყვავებას. საინტერესოა ამ ხალხის იმედი აქვს ბიძინა ივანიშვილს? მას ჰგონია რომ ეს ხალხი შეაგროვებს არჩევნებში ბიძინა ივანიშვილის კუთვნილი პარტიისთვის ხმების გადამწყვეტ რაოდენობას?
დაახლოებით ერთი თვის წინ გაირკვა რომ ხორავა მორიგი სკანდალის ეპიცენტრში აღმოჩნდა. საქმე ეხება ივანიშვილის ყბადაღებული ხეების გადაზიდვას. ივანიშვილი რკინიგზის მუშებსაც უხდის ხელფასს ხეების გადაზიდვის გამო. აღმოჩნდა, რომ მუშებს რკინიგზამ ხელფასი არ გადაუხადა, მეტიც, ხელფასი რომ ერიცხებოდათ ხეების გადატანაში დასაქმებულებს, ეს მათ შემთხვევით გაიგეს და ამის შემდეგ მოითხოვეს ანაზღაურება. ხორავა ჩავიდა ნატანებში და მუშებს „საქმე გაურჩია“. მომხდარი გახმაურდა და რკინიგზა იძულებული გახდა მუშებისთვის მოპარული ხელფასი გადაერიცხა. ეს მოხდა წელს, ივნისში და თუ ვინმეს ჩვენს სიტყვებში ეჭვი ეპარება, შეუძლია გადაამოწმოს ფაქტი, რომელიც აუცილებლად დადასტურდება, იმიტომ რომ ეს არის სიმართლე!
“თაიმერი”
