ყირიმის ჯანკოისკის რაიონის სოფელ მაისკოეს მახლობლად მდებარე საწყობში საბრძოლო მასალა აფეთქდა, – ამის შესახებ ინფორმაციას რუსული მედია ე.წ. სოფლის საბჭოს ხელმძღვანელზე, ნიკოლაი კარპეცზე დაყრდნობით ავრცელებს.
”დიახ, იყო საბრძოლო მასალის აფეთქება. ეს მოხდა დაახლოებით დილის ექვს საათზე,” – განაცხადა კარპეცმა რუსულ მედიასთან საუბარში.
საბრძოლო მასალის აფეთქების შესახებ ინფორმაციას რუსეთის თავდაცვის სამინისტროშიც ადასტურებენ.
„ერთ-ერთ სამხედრო ნაწილში, საბრძოლო მასალის დროებითი შესანახ ტერიტორიაზე ცეცხლი გაჩნდა, რის შედეგადაც საბრძოლო მასალა აფეთქდა“, – აცხადებენ სამინისტროში.
მათივე ცნობით, არსებული ინფორმაციით, სერიოზული დაზიანება არავის მიუღია. მიმდინარეობს ხანძრის სალიკვიდაციო სამუშაოები და ხანძრის გამომწვევი მიზეზების დადგენის მიზნით შესაბამისი ღონისძიებები ხორციელდება.
