უკრაინელი სამხედრო ექსპერტის განცხადებით, რუსეთის პრეზიდენტი ვლადიმერ პუტინი ყველასგან იზოლირებული ხდება – სერგეი ლავროვიც კი პუტინისგან დისტანცირებას ცდილობს. ამის შესახებ უკრაინელმა სამხედრო ექსპერტმა ოლეგ ჟდანოვმა ისაუბრა.
ვლადიმერ პუტინი დანარჩენი სამყაროსგან იზოლირებულია. რუსეთის პრეზიდენტი ურთიერთობას უახლოეს გარემოცვასთანაც კი წყვეტს. უკრაინელი სამხედრო ექსპერტის ოლეგ ჟდანოვის თქმით, რუსეთის საგარეო საქმეთა მინისტრი სერგეი ლავროვი კრემლის ლიდერს ორ კვირაზე მეტია არ უნახავს.
სამხედრო ექსპერტმა ხაზგასმით აღნიშნა, რომ პუტინი მხოლოდ და მხოლოდ პესკოვის იმედად დარჩა.
„ლავროვი ცდილობს, როგორმე შეინარჩუნოს კავშირები საგარეო დიპლომატიურ დონეზე, მაგრამ მე მას ვერ ვხედავ შეხვედრების სიაში. ის ცდილობს დისტანცირებას პუტინისგან, რომელსაც დიმიტრი პესკოვის გარდა აღარავინ დარჩა“, – განაცხადა ოლეგ ჟდანოვმა.
სამხედრო ექსპერტი მიიჩნევს, რომ დისტანცირების ინიციატივა თავად ლავროვს ეკუთვნის და ეს პროცესი 2021 წლის ბოლოს დაიწყო. ჟდანოვმა თქვა, რომ ლავროვმა ჯერ კიდევ მაშინ გადადგა ნაბიჯი უკან, როდესაც 17 დეკემბერს დასავლეთისთვის ულტიმატუმის გამოცხადებაზე უარი თქვა და ამის გაკეთება, თავის მოადგილეს დაავალა.
„და როდესაც მან უარი თქვა რუსეთის დელეგაციის ხელმძღვანელობაზე, როდესაც ულტიმატუმი განიხილებოდა, მან დაიწყო საერთაშორისო შეხვედრების გამართვა, მაგრამ მას შემდეგ, რაც გაეროს სხდომაზე დასწრების უფლება არ მისცეს, მან დატოვა რუსეთი“, – განაცხადა ჟდანოვმა.
