ბათუმში სამი დღის წინ მომხდარი დაპირისპირება კვლავ განხილვის თემაა პოლიტიკურ სპექტრში. ოპოზიცია ხელისუფლებას დაგვიანებულ რეაქციაში ადანაშაულებს. “ევროპული საქართველოს” წევრები ამბობენ, რომ მმართველმა გუნდმა 11 მარტს ბათუმში პროვოკაცია, მათი თქმით, სუს-ის აგენტის მერაბ ღოღობერიძის მეშვეობით მოაწყო.
პარტიაში “ნაციონალური მოძრაობის” წევრების მიერ აქციისთვის გამოხატულ სოლიდარობაზეც ამახვილებენ ყურადღებას და აცხადებენ, რომ “ენმ”-მ ხელისუფლებას და აქციის მონაწილეებს ვანდალიზმისთვის ნოყიერი ნიადაგი შეუქმნა.
„აქ იკვეთება ხელისუფლების რომელიმე სამართალდამცავი შტოს მონაწილეობა, ვინაიდან ბატონი ღოღობერიძე ცნობილია, როგორც სუს-ის ზონდერი. სუს-ი იყენებდა მას საკონსტიტუციო სასამართლოზე თავდასხმისთვის, იყენებდა პოლიტიკურ ოპოზიციაზე შეტევისთვის. “ნაციონალურმა მოძრაობამ” ნოყიერი ნიადაგი შეუქმნა აბსურდული სოლიდარობის გამოხატვით ამ ვანდალიზმის მიმართ,“-აცხადებს ოთარ კახიძე.
