აფეთქება დიდ დიღომში – კომპანია “ყაზტრანსგაზ-თბილისის” განცხადებას ავრცელებს. კომპანიაში აცხადებენ, რომ მუშაობა საგანგებო რეჟიმში მიმდინარეობს.
უფრო კონკრეტული განცხადების გავრცელებას კი „ყაზტრანსგაზ-თბილისი“ დეტალების დაზუსტების შემდეგ გააკეთებს.
„ყაზტრანსგაზ-თბილისი“ მუშაობს საგანგებო რეჟიმში. ამ დროისთვის მიმდინარეობს გამოძიება. კომპანიის ხელმძღვანელები პირველივე წუთებიდანვე იმყოფებიან შემთხვევის ადგილზე. დეტალების დაზუსტების შემდეგ გაკეთდება ოფიციალური განცხადება.
კომპანია „ყაზტრანსგაზ-თბილისი“ უსამძიმრებს გარდაცვლილთა ოჯახის წევრებს,“ – აღნიშნულია განცხადებაში.
ამ წუთებში სამართალდამცავები „ყაზტრანსგაზ-თბილისის“ თანამშრომლებს კითხავენ.
აფეთქება დიდ დიღომში რამდენიმე საათის წინ მოხდა. შემთხვევის შედეგად 4 ადამიანი დაიღუპა, მათ შორის, ერთი არასრულწლოვანი. შემთხვევის შედეგად დაშავებულია 8 ადამიანი.
ადგილზე სახანძრო-სამაშველო სამსახურის და სასწრაფო სამედიცინო დახმარების ბრიგადებია მობილიზებული, ასევე, იმყოფებიან ექსპერტ-კრიმინალისტებიც. დაშავებულები თბილისის სხვადასხვა კლინიკაში გადაიყვანეს.
ადგილობრივების თქმით, მთელი დღის განმავლობაში ბუნებრივი აირის სუნი იგრძნობოდა, რის გამოც გამოიძახეს „ყაზტრანსგაზის“ წარმომადგენლები, თუმცა, მათ პრობლემა ვერ შენიშნეს და ტერიტორია დატოვეს.
