სამშენებლო კომპანია m2-ის უძრავი ქონების დირექტორი რუსულ კანონს მხარდაჭერას უცხადებს – კახა კალაძესთან დაახლოებული ბიზნესმენი, შოთა ბერეკაშვილი სოციალურ ქსელში განცხადებას ავრცელებს.
აღსანიშნავია, რომ ბერეკაშვილის მეუღლე, მაკა კვიციანი ცნობილი ქართული ბრენდის, Dalood-ის კრეატიული დირექტორია. მაკა კვიციანი 15 წელზე მეტია, რაც “ქართული ოცნების” ლიდერთან, კახა კალაძეს მეუღლესთან, ანუკი არეშიძესთან მეგობრობს.
გავრცელებული ინფორმაციით, წინა მოწვევის პარლამენტში მაკა კვიციანის და, ბაია კვიციანი “ქართული ოცნების“ საარჩევნო სიაში სწორედ კახა კალაძის კვოტით მოხვდა.
“მინდა გამოვეხმაურო ბოლო დროს საზოგადოებაში განვითარებულ მოვლენებს. რეგიონში ურთულესი გეოპოლიტიკური ვითარებაა შექმნილი, რომელიც არნახული გამოწვევების წინაშე აყენებს ჩვენს ქვეყანას. ასეთ ვითარებაში სრულიად საქართველოს გვმართებს დიდი სიფრთხილის გამოჩენა, რათა წლების მანძილზე თითოეული ჩვენგანის დაუღალავი შრომის მონაპოვარი არ დავკარგოთ. საქართველოს მომავალი ევროპული ინტეგრაციის გარეშე წარმოუდგენელია”, – ამის შესახებ ბიზნესმენი შოთა ბერეკაშვილი სოციალურ ქსელში წერს.
მისი განცხადებით, რეგიონში არსებული ურთულესი გეოპოლიტიკური ვითარების ფონზე, საქართველოს დიდი სიფრთხილე მართებს. როგორც ბიზნესმენი წერს, სახელმწიფოს მიერ კონსტრუქციული ბიზნეს გარემოს შექმნის შედეგია ის სწრაფი ეკონომიკური ზრდა, რომელიც საქართველოში ფიქსირდება ყოველწლიურად. რაც შეეხება გამჭვირვალობას, ბერეკაშვილის განცხადებით, გამჭვირვალობა არის ჯანსაღი მოვლენა, რომელიც დემოკრატიის ერთ-ერთი უდიდესი მონაპოვარია.
“მინდა გამოვეხმაურო ბოლო დროს საზოგადოებაში განვითარებულ მოვლენებს. რეგიონში ურთულესი გეოპოლიტიკური ვითარებაა შექმნილი, რომელიც არნახული გამოწვევების წინაშე აყენებს ჩვენს ქვეყანას. ასეთ ვითარებაში სრულიად საქართველოს გვმართებს დიდი სიფრთხილის გამოჩენა, რათა წლების მანძილზე თითოეული ჩვენგანის დაუღალავი შრომის მონაპოვარი არ დავკარგოთ.
საქართველოს მომავალი ევროპული ინტეგრაციის გარეშე წარმოუდგენელია. ევროინტეგრაციის იდეა ასულდგმულებს ქართველ ხალხს საბჭოთა მარწუხებისგან გათავისუფლების დღიდან. ჩვენ კარგად გვესმის, რომ ევროპულ ოჯახში შესვლა არ არის მარტივი პროცესი, თუმცა ამ მიმართულებით ჩვენმა ქვეყანამ მნიშვნელოვანი პროგრესი აჩვენა წარმოუდგენლად მოკლე დროში.
ევროკავშირთან ასოცირების ხელშეკრულებამ უამრავი სიკეთე მოუტანა ჩვენს ქვეყანას და კერძოდ სამშენებლო სექტორს. კანონმდებლობის და რეგულაციის ევრონორმებთან ჰარმონიზაციის შედეგია ის, რომ დღეს საქართველოში მშენებლობა ხორციელდება წამყვანი ქვეყნებისთვის დამახასიათებელი უსაფრთხოების და ხარისხის ნორმების სრული დაცვით. ევროინტეგრაციის გზაზე სერიოზული პროგრესის მიუხედავად, გასაკეთებელი კიდევ ბევრია.
სამწუხაროდ ქვეყნის შიგნით და ქვეყნის გარეთ არიან ძალები, რომლებიც საკუთარი ვიწრო-პოლიტიკური მიზნების მისაღწევად არ ერიდებიან საქართველოს და საკუთარი ხალხის ინტერესების მსხვერპლად შეწირვას. არაერთი უსაფუძვლო და დაუდასტურებელი ბრალდების ადრესატი გამხდარა ჩვენი ქვეყანა ბოლო 2 წლის განმავლობაში მას შემდეგ, რაც რუსეთი თავს დაესხა უკრაინას. დრომ აჩვენა, რომ საქართველო თავისი ხალხით, კერძო და სახელმწიფო სექტორებით მყარად დგას თავისუფლების, სუვერენიტეტის და საერთაშორისო სამართლის ნორმების დაცვის მხარეს.
ევროკავშირში გაწევრიანება კომპლექსური პროცესია, რომელიც კანდიდატი სახელმწიფოსგან ბევრი მიმართულებით მოითხოვს მნიშვნელოვან პროგრესს. ამ კუთხით, ქვეყნის ეკონომიკური მზაობა ერთ-ერთი უმნიშვნელოვანესი პარამეტრია.
დღეს საქართველოში ჩამოყალიბდა ბიზნესის განვითარებისთვის ძალზედ ნაყოფიერი გარემო. სახელმწიფო სექტორი და მთავრობა მუდმივ დიალოგში იმყოფება კერძო სექტორთან. ნებისმიერი საკანონმდებლო ცვლილება, რომელიც ბიზნესის წარმოებას უკავშირდება წინასწარ განხილვას ექვემდებარება ამ ორი სექტორის წარმომადგენლებს შორის. ხშირად პოზიციები განსხვავებულია, მაგრამ მისასალმებელია საქართველოს მთავრობის და სახელმწიფოს მიდგომა გამოინახოს ისეთი გადაწყვეტილებები, რომლებიც ორივე მხარის ინტერესებს ითვალისწინებს და არ წარმოადგენს მხოლოდ ერთი მხარის “გამარჯვებას”.
ასეთი კონსტრუქციული ბიზნეს გარემოს შექმნის შედეგია ის სწრაფი ეკონომიკური ზრდა, რომელიც საქართველოში ფიქსირდება ყოველწლიურად. ასევე, დიდია სამოქალაქო საზოგადოების წვლილი ჩვენი ქვეყნის დემოკრატიული განვითარების გზაზე. ჩვენ დემოკრატიულ სახელმწიფოში ვცხოვრობთ და პატივი უნდა ვცეთ, როგორც ერთმანეთის აზრს, ისე უმრავლესობის პოზიციას, რომელიც ფიქსირდება აზრის გამოხატვის დემოკრატიული მექანიზმებით. დემოკრატიის ერთ-ერთი უდიდესი მონაპოვარი კი გამჭვირვალობაა, რომლის გარეშეც ამ სისტემის ფუნქციონირება წარმოუდგენელია. გამჭვირვალობა არის ჯანსაღი მოვლენა, გაუმჭვირვალობა კი უზარმაზარ საფრთხეებს შეიცავს, განსაკუთრებით პატარა სახელმწიფოებისთვის, რომლებიც ძალიან მოწყვლადი არიან ეგზოგენური ფაქტორების მიმართ. ასევე, ჯანსაღი კონკურენცია საწინდარია და უფრო მეტიც, ერთგვარი დაცვის მექანიზმია ისეთი მოთამაშეებისგან, რომლებიც ცდილობენ უპირატესობის მოპოვებას არაკეთილსინდისიერი მეთოდებით. და ბოლოს, უინსტონ ჩერჩილის პარაფრაზი, რომ გავაკეთოთ დემოკრატია მმართველობის საშინელი ფორმაა, თუმცა ბევრად სჯობს ყველაფერს სხვას, რაც კაცობრიობამ გამოსცადა”, – წერს შოთა ბერეკაშვილი.
