18-19 იანვარს სტრასბურგში ევროპარლამენტის პლენარული სესია გაიმართება. 20 იანვარს სხდომაზე მოხსენებით საგარეო ურთიერთობებში ევროკავშირის უმაღლესი წარმომადგენელი ფედერიკა მოგერინი წარსდგება. სესიაზე რეზოლუციის მიღებაც მოხდება, რომელიც საქართველოს, მოლდოვის და უკრაინის ევროკავშირთან ინტეგრაციის პროგრესს განიხილავს და პოლიტიკურ, სასამართლო და სხვა რეფორმების მიმდინარეობას შეეხება.
ევროპარლამენტის რეზოლუცია არასავალდებულო ხასიათისაა, თუმცა ინტეგრაციული პროცესის მიმდინარეობისა და ხარისხის პოლიტიკური შეფასების თვალსაზრისით არსებითი მნიშვნელობის მატარებელია. ეს იქნება პირველი რეზოლუცია, რომელსაც ევროპარლამენტი საქართველოსა და ევროკავშირს შორის ასოცირების შეთანხმების ყველა ქვეყნის მიერ რატიფიცირების შემდეგ მიიღებს.