“ჩვენ უნდა გავიგოთ და კარგად ვისწავლოთ ჩვენი უფლებები და ასევე გავიაზროთ ჩვენი მოვალეობები”

news
ავტ.: news ივნისი 9, 2016 14:07

“ჩვენ უნდა გავიგოთ და კარგად ვისწავლოთ ჩვენი უფლებები და ასევე გავიაზროთ ჩვენი მოვალეობები”

ყოფილი პრემიერ-მინისტრის ბიძინა ივანიშვილის აზრით, არსებული ეკონომიკური სიდუხჭირის ფონზე „ასეთი ტიპის დემოკრატია შეიცავს გარკვეულ ხიფათს, რომ შეჭირვებულმა მოსახლეობამ შეიძლება სწორი ანალიზი ვერ გააკეთოს და ხელისუფლების ბრალეულობად ჩათვალოს, ის, რაც ხდება“. ამის შესახებ ბიძინა ივანიშვილმა გამოცდების ეროვნულ ცენტრში სამოქალაქო განათლების ოლიმპიადის გამარჯვებულებთან შეხვედრაზე განაცხადა.

ბიძინა ივანიშვილმა კიდევ ერთხელ ისაუბრა მის მიერ გამოქვეყნებულ წერილზე და ასევე სამოქალაქო საზოგადოების როლზე ქვეყნის განვითარებაში.

„ჩვენ უნდა გავიგოთ და კარგად ვისწავლოთ ჩვენი უფლებები და ასევე გავიაზროთ ჩვენი მოვალეობები. თუ ვერ მოვახერხებთ იმ მინიმალური მოვალეობის შესრულებას რაც მოქალაქეს აკისრია, მივიღებთ ბევრ გაუგებრობას. ჩვენ საოცარი გარდატეხა მოვახდინეთ 4 წლის განმავლობაში, ის რომ დიქტატურისკენ მიმავალი ქვეყანა დემოკრატიის რელსებზე გადავსვით, არ იყო მარტივი. ამას დაჟინებული შრომა სჭირდებოდა. ეს ხელიდან არ უნდა გავუშვათ, მითუმეტეს დემოკრატიულ ღირებულებებს, რომელიც დაინერგა ახალი გუნდის მოსვლის შემდეგ და ახლოსაა ევროპულთან, სჭირდება გაღრმავება. ამ დროს ეკონომიკა ძალიან განსხვავდება ევროპული ეკონომიკისგან, ერთ სულ მოსახლეზე წარმოებული პროდუქტით 6-ჯერ და უფრო მეტჯერ ჩამოვრჩებით განვითარებულ ევროპულ ქვეყნებს. ამ დროს ასეთი ტიპის დემოკრატია შეიცავს გარკვეულ ხიფათსაც, რომ შეჭირვებულმა მოსახლეობამ, რომელიც საკმაოდ გვყავს ჩვენს ქვეყანაში, შეიძლება სწორი ანალიზი ვერ გააკეთოს და ხელისუფლების ბრალეულობად ჩათვალოს ის რაც ხდება“, – განაცხადა ბიძინა ივანიშვილმა.

მისივე თქმით, 25 წელი მოჯადოებულ წრეზე დავდივართ და ეს წრე 2012 წლის არჩევნებზე გაიხსნა. ივანიშვილის აზრით, საქართველოში ყველაფერი მორგებულია ადამიანის უფლებებზე, თუმცა პარალელურად ირღვევა ადამიანის ერთ-ერთი ძირეული უფლება, იშოვოს ღისეული სამუშაო ადგილი.
„ეს გაჭირვება არის. 3-4 წელიწადში ამას ვერ მოვერეოდით და ვერც მოვერიეთ, თუმცა ტენდენცია კარგია და აუცილებლად მივაღწევთ გამარჯვებას“, – განაცხადა ივანიშვილმა და აღნიშნა, რომ ამ გამარჯვებას 10-15 წელიწადი დასჭირდება თუ იქნება პოლიტიკური სტაბილურობა, ეკონომიკური განვითარება და გამჭვირვალე ხელისუფლება. ამ ყოველივეს კი, ბიძინა ივანიშვილის აზრით, სწორი არჩევნები სჭირდება, რომელიც საზოგადოებამ უნდა ჩაატაროს.

news
ავტ.: news ივნისი 9, 2016 14:07

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


7,170
ვიზიტორი
დღეში
Powered By Google Analytics