არჩილ თალაკვაძე სამუშაო ვიზიტით ამერიკის შეერთებულ შტატებს ეწვევა

ქეთი ფერაძე
ავტ.: ქეთი ფერაძე თებერვალი 5, 2020 09:58

არჩილ თალაკვაძე სამუშაო ვიზიტით ამერიკის შეერთებულ შტატებს ეწვევა

საქართველოს პარლამენტის თავმჯდომარე არჩილ თალაკვაძე საპარლამენტო დელეგაციასთან ერთად 5-10 თებერვალს ამერიკის შეერთებულ შტატებს ეწვევა.

პარლამენტის პრესსამსახურის ცნობით, ვიზიტის ფარგლებში, პარლამენტის თავმჯდომარე აშშ-ის პრეზიდენტის მიერ ორგანიზებულ ყოველწლიურ შეკრებაში, National Prayer Breakfast-ში მიიღებს მონაწილეობას. არჩილ თალაკვაძე ვიზიტის ფარგლებში ამერიკის შეერთებული შტატების კონგრესში და სენატში მაღალი დონის შეხვედრებს გამართავს .

შეხვედრები ასევე გაიმართება სახელმწიფო მდივნის მოქმედ თანაშემწესთან, ფილიპ რიკერთან, ამერიკის შეერთებული შტატების საერთაშორისო განვითარების სააგენტოს (USAID) ადმინისტრატორის თანაშემწესთან, ბროკ ბიერმანთან, ორგანიზაცია Trammo Inc–ის აღმასრულებელ დირექტორთან ედუარდ ვეინერთან და ექსპერტებთან.

საქართველოს პარლამენტის თავმჯდომარე თანმხლებ დელეგაციასთან ერთად ბაქსვუდის საერთაშორისო სკოლის სტუდენტებს შეხვდება და ასევე, ვაშინგტონის ქართული მემკვიდრეობის აკადემიას ეწვევა.

დელეგაციის შემადგენლობაში საქართველოს პარლამენტის თავმჯდომარის მოადგილე კახა კუჭავა და პარლამენტის თავმჯდომარის კაბინეტის უფროსი ნიკოლოზ სამხარაძე შედიან.

ქეთი ფერაძე
ავტ.: ქეთი ფერაძე თებერვალი 5, 2020 09:58