აფხაზეთის თვითგამოცახდებული რესპუბლიკის საგარეო საქმეთა სამინისტრო აშშ-ს მიერ სირიის ავიაციის დაბომბვის ფაქტს ეხმაურება და სპეციალურ განცხადებას ავრცელებს. “ეს სამხედრო აქცია, რომელიც საერთაშორისო სამართლის დარღვევით მოხდა და რომელსაც საეჭვო მიზეზი ჰქონდა, სუვერენული სახელმწიფოს წინააღმდეგ აგრესიის ფაქტია” – წერია განცხადებაში.
“აფხაზეთის საგარეო საქმეთა სამინისტრო კატეგორიულად გმობს ამერიკელი სამხედროების აგრესიულ მოქმედებებს და საერთაშორისო თანამეგობრობას მოუწოდებს ადეკვატურად შეაფასონ აშშ-ს მოქმედებები სირიაში” – წერია თვითგამოცხადებული რესპუბლიკის საგარეო უწყების მიერ გავრცელებულ განცხადებაში, რომელიც მათ ოფიციალურ “ფეისბუქ” გვერდზე დაიდო.
თვითგამოცხადებული აფხაზეთის რესპუბლიკის მიერ გავრცელებული განცხადება აბსოლუტურად იმეორებს რუსეთის პოზიციას და შეფასებებს აღნიშნულ ფაქტთან დაკავშირებით – რუსეთის პრეზიდენტმა ვლადიმირ პუტინმა აშშ-ს ავიადარტყმებს “სუვერენული სახელმწიფოს წინააღმდეგ მიმართული აგრესიის ფაქტი” უწოდა.
შეგახსენებთ, რომ დღეს დილით აშშ-მ 59 ფრთიანი რაკეტა “ტომაგავკი” დაარტყა ცენტრალურ სირიაში სამხედრო აეროპორტს. აშშ-ს პრეზიდენტმა დონალდ ტრამპმა სარაკეტო დარტყმებს, სირიის პროვინცია იდლიბში სამშაბათს სირიის სამთავრობო ძალების მიერ გამოყენებული გაზის გამო, შურისძიება უწოდა.
