ამირან გამყრელიძე- გარდაბანში ეპიდემიური ვითარება საყურადღებოა და ხვალიდან ორ სოფელში გაფართოებული ტესტირება დაიწყება

region
ავტ.: region ივლისი 20, 2020 15:51

ამირან გამყრელიძე- გარდაბანში ეპიდემიური ვითარება საყურადღებოა და ხვალიდან ორ სოფელში გაფართოებული ტესტირება დაიწყება

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, საქართველოში კვლავ ჭარბობს კორონავირუსის შემოტანილი შემთხვევები.

მისივე თქმით, ახალი შემთხვევების დროული იდენტიფიცირება ხდება. თუმცა, აქვე გამყრელიძე აღნიშნავს, რომ გარდაბანში არსებული ეპიდემიური ვითარება საყურადღებოა.

ამირან გამყრელიძის განმარტებით, ხვალიდან გარდაბნის ორ სოფელში გაფართოებული ტესტირება იწყება.

„ისევ და ისევ ჭარბობს იმპორტირებული შემთხვევები, რომლებსაც ჩვენ დროულ იდენტიფიკაციას ვუკეთებთ და შემდეგ დროულად გადაგვყავს სამკურნალოდ. ცოტა გვაღელვებს მდგომარეობა, რაც ვითარდება ქვემო ქართლში, გარდაბანში. გარდაბანის ორ სოფელში, სადაც ბოლო 20 შემთხვევა გვაქვს დადასტურებული, ხვალიდან იწყება გაფართოებული ტესტირება. სოფლების ჯგუფია, პირდაპირ გეტყვით. ერთ-ერთ სოფელში გვაქვს უკვე 11 ინფიცირება და ხვალიდან ორ სოფელში დავიწყებთ გაფართოებულ ტესტირებას. ანუ, გვინდა, რომ მთლიანად სოფლის მოსახლეობა გავტესტოთ. სადაც დადებითი იქნება, დროულად რომ იქნას იზოლირებული და გადაყვანილი სამკურნალოდ.

ვფიქრობთ, რომ ეს კლასტერი, რომელიც თანდათან ძლიერდება, დროულად ჩავახშოთ. ჩვენ ვფიქრობთ, რომ ამ რეგიონში დაიტესტება რამდენიმე ათასი ადამიანი. რაც შეეხება პირველწყაროს, რამდენიმე შემთხვევაში ცნობილია, სამ შემთხვევაში კი ჯერჯერობით არ ვიცით“, – განაცხადა გამყრელიძემ.

კითხვაზე, არის თუ არა საშიშროება, რომ აღნიშნული სოფლები ჩაიკეტოს, გამყრელიძე პასუხობს, რომ ამ საკითხზე საკოორდინაციო საბჭო ხვალ იმსჯელებს.

region
ავტ.: region ივლისი 20, 2020 15:51