პოლიციელების მკვლელობაში ბრალდებული შალვა აბულაძის აღმკვეთი ღონისძიების საკითხთან დაკავშირებით სასამართლო დღეს გაიმართება. თუმცა, ზუსტი დრო ჯერჯერობით უცნობია.
სასამართლოს გამართვის შესახებ ინფორნაცია ჟურნალისტებს მისმა ადვოკატმა, თამარ გაჩეჩილაძემ მიაწოდა.
მისი თქმით, შსს-ს განყოფილებაში აბულაძის მიმართ ბრალის დაზუსტება მოხდა და ასევე ორი მკვლელობის საქმე ერთ საქმედ გაერთიანდა.
“შალვა აბულაძეს წადგენილი ჰქონდა 109-ე მუხლი, მოხდა ბრალის დაზუსტება და აღნიშნული მუხლი შეიცვალა 353-ე პრიმა მუხლის მესამე ნაწილით. დღეს ორი მკვლელობის საქმე გაერთიანდა და ერთ საქმედ გარდაიქმნა, რომელზეც აღკვეთის ღონისძიების საკითხთან დაკავშირებით სასამართლოში სხდომა სავარაუდოდ დღეს ჩატარდება,” – განაცხადა თამარ გაჩეჩილაძემ.
ამასთან, ის ამბობს, რომ შალვა აბულაძე სტრესული მდგომარეობის გამო ჩვენების მიცემაზე ამ ეტაპზე უარს ამბობს, თუმცა, წარდგენილ ბრალდებას ეთანხმება.
