კინოსტუდია “ქართული ფილმთან” დაკავშირებით გამოცხადებულ კონკურსზე შექმნილი ვნებათაღელვა ჭიქაში ქარიშხალი მგონია, – ამის შესახებ ჟურნალისტებს კულტურისა და ძეგლთა დაცვის მინისტრმა, მიხეილ გიორგაძემ პარლამენტში განუცხადა, სადაც განათლებისა და კულტურის კომიტეტის წევრებთან ერთად, დახურულ ფორმატში კინოსტუდიისა და კინოცენტრის წარმომადგენლებს შეხვდა.
მინისტრი კიდევ ერთხელ განმარტავს, რომ დაგეგმილი კონკურსის მიზანი მხოლოდ “ქართული ფილმის” მართვაში გადაცემაა, მისი 100%-იანი წილის მფლობელი კი, კვლავ სახელმწიფო იქნება.
როგორც გიორგაძემ შეხვედრის შემდეგ აღნიშნა, ამის საპირისპირო შინაარსობრივი და საგნობრივი არგუმენტები მან დღეს კინემატოგრაფისტებისგან ვერ მოისმინა.
ამასთან, მინისტრის ცნობით, კონკურსის პირობები უახლოეს დღეებში ჩამოყალიბდება.
“საკითხის გადაწყვეტის ერთადერთი სამართლებრივი ფორმა გამჭირვალე კონკურსი გახლავთ, რომელიც ყველაზე მთავარი – პროფილის მუდმივი შენარჩუნების პირობით ჩატარდება. კონკურსი მხოლოდ კინოწამოებისთვის იქნება გამოცხადებული და არა ზოგადად რაიმე საინვესტიციო პროექტებისთვის, რომელიც კინოწამოების გარდა, სხვა კომერციულ თემებს შეიძლება გულისხმობდეს. სიმართლე გითხრათ, შინაარსობრივი, საგნობრივი არგუმენტი ამის საწინააღმდეგოდ ვერაფერი მოვისმინე. იყო ემოციური გამოსვლები იმასთან დაკავშირებით, რომ ადრე ბევრი დაპირება იყო, რაც შემდგომ არ განხორციელდა, სხვადასხვა კონკურსი ჩატარებულა, რაც შემდეგ სხვა რამ აღმოჩდა და ასე შემდეგ. კინომატოგრაფისტებს შევპირდი, რომ საკონკურსო პირობებს მათთან ერთად გავივლი და თუ რაიმე შესასწორებელი იქნება, არც ამის გაკეთებაა პრობლემა. კომისიაშიც, რომელიც წარმოდგენილ კონცეფციებს და კინოსტუდიის განვითარების გეგმებს შეაფასებს, ამ სფეროს წარმომადგენლები მაქსიმალუარდ იქნებიან ჩართული. მთელი ეს ვნებათაღევა ჭიქაში ქარიშხალი მგონია. ძალიან დიდი იმედი მაქვს, რომ ყველაფერი კონსტრუქციულ და საგნობრივ დიალოგში გადავა და არაფერზე დაფუძნებული ეჭვები დასრულდება”, – განაცხადა ჟურნალისტებთან საუბრისას მიხეილ გიორგაძემ.
