ენერგეტიკის მინისტრის, ვიცე პრემიერის კახა კალაძის განცხადებით, “გაზპრომთან” დღეს მოქმედ ხელშეკრულებას 2003 წელს მოეწერა ხელი და მას შემდეგ 21 დამატება იქნა გაფორმებული ვადის გაგრძელებისა და სხვადასხვა ტექნიკური საკითხების დარეგულირების მიზნით.
ამის შესახებ კახა კალაძემ დღეს გამართულ პრესკონფერენციაზე განაცხადა. როგორც კალაძემ განაცხადა, აღნიშნულ კომპანიასთან წლებია არსებობს კომუნიკაცია და ხელშეკრულება.
“ეს პირველ რიგში, ძალიან კარგად იციან იმ ადამიანებმა ვინც ამ თემაზე ყველაზე მეტს ყვიროდა და ყველაზე მეტს საუბრობდა. “გაზპრომთან” დღეს მოქმედ ხელშეკრულებას 2003 წელს მოეწერა ხელი და მას შემდეგ 21 დამატება იქნა გაფორმებული ვადის გაგრძელებისა და სხვადასხვა ტექნიკური საკითხების დარეგულირების მიზნით”, – განაცხადა კალაძემ.
მისივე თქმით, “გაზპრომთან” არსებული ხელშეკრულების ფარგლებში ყოველწლიური შეხვედრები იმართებოდა წლების განმავლობაში სააკაშვილის რეჟიმის დროსაც და მანამდეც.
“გარდა ტრანზიტის საფასურად მიღებული გაზისა, ომის შემდგომაც კი ხდებოდა დამატებითი მოცულობების მიღება რუსეთიდან. მაგრამ, რატომღაც, ამ ფაქტებს ივიწყებენ და არავინ საუბრობს. არსებობს პოლიტიკური მორალის რაღაც ზღვარი, რომელსაც ყველაზე მარგინალმა, ბანკროტმა პოლიტიკოსმა თუ პარტიამ არ უნდა გაადაბიჯოს. გასაგებია, რომ არჩევნების წელი მოდის და პოლიტიკურად გაკოტრებული პარტიები, პოლიტიკოსები შეეცდებიან, რომ მოსახლეობას რაღაცით შეახსენონ თავი”, – განაცხადა კახა კალაძემ.
