ირინა სარიშვილი “ფესბუქის” საკუთარ გვერდზე საქართველოს პრეზიდენტის გიორგი მარგველაშვილის ინტერვიუს აფასებს, რომელიც ტელეკომანია რუსთავი 2–ის ეთერში გავიდა.
მე მესმის, რომ დღეს პრეზიდენტს ძველი უფლებები არა აქვს.
მაგრამ მას აქვს ლაპარაკის და სიმართლის თქმის უფლება.
მე მესმის, რომ პრეზიდენტი, თუნდაც შეკვეცილი უფლებებით, ქვეყნის პირველი პირია და საკუთარ მოსაზრებას რადიკალურად ვერ გამოთქვამს.
მაგრამ დიპლომატია არ ნიშნავს ტყუილის ან არაფრის თქმას.
მე ყველა პრეზიდენტს ვიცნობდი, თან კარგად.
ვიყავი ზვიად გამსახურდიას წინააღმდეგი, მაგრამ პატივს ვცემდი.
ვიყავი შევარდნაძის მომხრეც და წინააღმდეგიც და ისიც პიროვნება იყო.
ვიყავი სააკაშვილის წინააღმდეგი, რაღაცეებში ვეთანხმებოდი, რაღაცეებში დღესაც ვერ ვეთანხმები, მაგრამ დღეს წარმატებას ვუსურვებ იქ, სადაც არის და სადაც საქართველოს ბედი წყდება, რადგან ის უძლიერესი პიროვნებაა.
ამდენი შეკითხვის პასუხად, რომლებიც ეხებოდა ქვეყნის უმწვავეს პრობლემებს,როგორც საშინაო, ასევე საგარეო კუთხით, როცა ადამიანი ადექვატურად მხოლოდ იმაზე რეაგირებს, ვინ უნდა ყოფილიყო ამერიკაში დელეგაციის ხელმძღვანელი და სხვა ყველაფერზე ისეთ პასუხებს იძლევა, რომლის მოკლე შინაარსსაც თავადაც ვერ გაიმეორებს, მხოლოდ ერთი დასკვნის გაკეთება შეიძლება: გაბუნიამ და მისმა მაყურებელმა დრო დაკარგა, დრო, რომელიც შეიძლებოდა, ბევრად სასარგებლო თემებისთვის დაეთმო.
ერთადერთი შედეგი, რაც ამ ტანჯულ ინტერვიუს შეიძლება მოჰყოლოდა “პრეზიდენტისთვის” – სავარაუდოდ კარგა გვარიანად წონაში დაიკლო.
ეს სტატუსი არ არის პრეზიდენტის წინააღმდეგ – რაც არ არსებობს, იმის წინააღმდეგი ვერ იქნები-წერს ირინა სარიშვილი