„ნაციონალური მოძრაობის” წარმომადგენელი ნიკა მელია თბილისის ზედამხედველობის სამსახურის უფროსს გეგი ნიჟარაძეს თანამშრომლებზე ზეწოლაში ადანაშაულებს და აცხადებს, რომ მას ქალაქის მთავრობაში მუშაობის მორალური უფლება არ აქვს.
ასე შეაფასა ოპოზიციური პარტიის წარმომადგენელმა დღეს გავრცელებული აუდიოჩანაწერი, სადაც, ჩანაწერის ავტორის მტკიცებით, გეგი ნიჟარაძე მერიის თანამშრომელს სამსახურის დატოვებას აიძულებს.
„ადამიანი, რომელიც ძალადობს აპლიკანტზე გასაუბრებისას, რომელიც ჩაკეტავს მას სამი საათის განმავლობაში, აგინებს დედას, ემუქრება ფიზიკური განადგურებით, თანამშრომლობს სუს-თან, არჩილ ბებიაშვილთან ერთად, რომელიც არის ე.წ. „ოდეერი” მერიაში და მუშაობს იქ აგვისტოს თვიდან, ამ ყველაფრის ფონზე ამ ადამიანს აქვს კიდევ კადნიერება, რომ იმუშაოს დედაქალაქის მერიაში. ამას ემატება კიდევ ახალი ჩანაწერი, რაც უკვე მიუთითებს იმაზე, რომ ბატონი ნარმანია არაფერ შუაში არ არის, ეს ადამიანი, როგორც ჩანს, არ ემორჩილება ნარმანიას,” – განაცხადა მელიამ.
შეგახსენებთ, რომ არასამთავრობო ორგანიზაცია „მედიატორმა” დღეს ფარული აუდიოჩანაწერი გაავრცელა, სადაც, მათი მტკიცებით, გეგი ნიჟარაძე მერიის ერთ-ერთ თანამშრომელს სამსახურიდან წასვლის თაობაზე განცხადების დაწერას აიძულებს.
საკრებულოს ფრაქცია „ნაციონალური მოძრაობის” წევრი ირაკლი ნადირაძე კი გეგი ნიჟარაძეს გადადგომისკენ მოუწოდებს.
„უნდა გადამდგარიყო, მაგრამ ქალაქს და ქვეყანას არ ჰყავს პატრონი. როგორც ჩანს, ნარმანიას სჭირდება ადამიანები, რომლებიც სწორედ ასეთ დანაშაულებრივ სქემებში არიან გარეულები,” – განაცხადა ირაკლი ნადირაძემ.