“ნაციონალური მოძრაობის” ერთ-ერთი ლიდერის, დავით ბაქრაძის განცხადებით, იმდენად დიდი ტრაგედია დატრიალდა, რომ ეს არ არის მხოლოდ სახელმწიფოს დასახმარებელი, არამედ საზოგადოების თითოეულმა წევრმა თავისი მცირე წვლილი უნდა შეიტანოს თბილისისა და თბილისელების დახმარებაში. ამის შესახებ მან ჟურნალისტებს გმირთა მოედანზე განუცხადა, სადაც მოხალისეებთან ერთად იმყოფება.
“სწორედ ამიტომ ვდგავართ ჩვენ დღეს აქ. მიმაჩნია, რომ ეს არ არის პოლიტიკის და პოლიტიკური დაპირისპირების ადგილი. დღეს ყველა უნდა ვეცადოთ დავეხმაროთ ხალხს, ჩვენს ქალაქს. სწორედ ამიტომ ჩვენ შევქმენით სპეციალური 400 კაციანი შემადგენლობის მოხალისეთა რაზმი, რომელიც მზად არის მერიასთან და სამაშველო სამსახურთან შეთანხმებით ქალაქის ნებისმიერ წერტილში დაეხმაროს გაჭირვებაში მყოფ მოსახლეობას”, – განაცხადა ბაქრაძემ.
მისივე თქმით, მათ ასევე შექმნეს შტაბი, სადაც ხდება ჰუმანიტარული დახმარების შეგროვება, რომელთაც ასევე მერიასთან და გამგეობებთან კოორდინირებით გადაუნაწილებენ დაზარალებულ მოსახლეობას. “ვფიქრობ ძალიან მნიშვნელოვანია დღეს ყველამ მივცეთ მაგალითი იმის, რომ მიუხედავად ყველა დაპირისპირებისა, ტრაგედიისა და კრიტიკული ვითარების დროს ქართველებს შეგვიძლია გავერთიანდეთ და ერთად დავუდგეთ გვერდით ჩვენი საზოგადოების დაზარალებულ წევრებს”, – განაცხადა დავით ბაქრაძემ.
