საპარლამენტო უმრავლესობის წევრის, ეკა ბესელიას განცხადებით, მას არაერთხელ უთქვამს და კიდევ იტყვის უარს კაბინეტზე და თანამდებობებზე, როდესაც საუბარი სამართლიანობის აღდგენას ეხება. ამის შესახებ ბესელიამ „ტვ პირველის“ ეთერში განაცხადა.
„ვიდრე ბატონი ირაკლი კობახიძე ახლა იმ კაბინეტთან დგას და, ასე მგონია, იცავს იმ კაბინეტის თემას, მე გავაგრძელებ იმ ფასეულობებისა და ღირებულებებისთვის ბრძოლას და მის დაცვას, რისთვისაც იმ კაბინეტზეც და ბევრ უკეთეს კაბინეტზეც უარი მითქვამს და კიდევ ვიტყვი, იმიტომ, რომ არ არის არც ერთი კაბინეტი და არც ერთი თანამდებობა საპირწონე ისეთი სახელმწიფოებრივი მნიშვნელობის თემების, როგორიც არის სამართლიანობა და შენი, ჩემი და ჩვენი ქვეყნის მომავლის და ჩვენი შვილების მომავლის გარანტიების შექმნა“, – განაცხადა ბესელიამ.
