თსუ-ს მაღლივ კორპუსთან დამაკავშირებელი საბაგირო 20 აპრილიდან ჩაირთვება

თბილისის სახელმწიფო უნივერსიტეტის მაღლივ კორპუსთან დამაკავშირებელი საბაგირო, რომელსაც რეაბილიტაცია ჩაუტარდა, მსურველებს 20 აპრილიდან მოემსახურება.

ამის შესახებ თბილისის მერმა კახა კალაძემ დღეს დედაქალაქის მთავრობის სხდომაზე განაცხადა.

„ბაგების მიმდებარე ტერიტორიაზე, მაღლივ კორპუსთან დამაკავშირებელ საბაგიროს, რომელიც რამდენიმე ათეული წელია არსებობს, რეაბილიტაცია ჩაუტარდა. სამუშაოები ეკონომიკის სამინისტრომ განახორციელა. ეს არის 320 მეტრი სიგრძის საბაგირო გზა და იგი ახლა გადმოეცემა თბილისის მერიას. პარალელურად, მიმდინარეობს ტექნიკური შემოწმება, უსაფრთხოების სისტემების გამართვა, სარევიზიო სამუშაოები. ამ სამუშაოების დასრულების შემდგომ, 20 აპრილიდან საბაგირო ამუშავდება და მსურველებს მოემსახურება“, – განაცხადა კახა კალაძემ.

თბილისის მერმა თბილისში საბაგიროების დაგეგმილ პროექტებზეც ისაუბრა.

„ზოგადად, ჩვენი მიდგომა და დამოკიდებულებაა, რომ გვაქვს კონკრეტული არეალები ქალაქში, სადაც კვლევის შედეგად გამოიყო ადგილები, სადაც შესაძლებელია საბაგიროს პროექტების განხორციელება. ორ მათგანზე უკვე კონკრეტულად ვმუშაობთ და დეტალურ ანალიზს ვაკეტებთ, პროექტირება ხდება. მომდევნო თვეების განმავლობაში, როდესაც პროექტი დამზადდება, დავიწყებთ სამუშაოების განხორციელებას“, – აღნიშნა თბილისის მერმა.

ვირუსის ბლოკატორები
წინა სტატიაშიკალაძე – ჩვენ ვიქნებით უკომპრომისოები და ძალიან პრინციპულები კორუფციასთან ბრძოლაში
შემდეგი სტატიაკახა კალაძე – ვაშლიჯვარში, მეწყრულ ზონაში უსაფრთხოების ზომები მაქსიმალურად გავამკაცრეთ