თეა წულუკიანი ჰააგის სასამართლოს პროკურორ ფატუ ბენსუდას შეხვდა

admin
ავტ.: admin დეკემბერი 4, 2019 10:08

თეა წულუკიანი ჰააგის სასამართლოს პროკურორ ფატუ ბენსუდას შეხვდა

საქართველოს ვიცე-პრემიერი, იუსტიციის მინისტრი თეა წულუკიანი ჰააგის სისხლის სამართლის საერთაშორისო სასამართლოს წევრი სახელმწიფოების ასამბლეის რიგით მე-18 სესიის ფარგლებში, ჰააგის სასამართლოს პროკურორ ფატუ ბენსუდას შეხვდა.

საქართველოს იუსტიციის სამინისტროს პრესსამსახურის ინფორმაციით, შეხვედრაზე იუსტიციის მინისტრმა რუსეთ-საქართველოს ომის გამოძიების შესახებ ისაუბრა და აღნიშნა, რომ საქართველოს მოსახლეობა, რომელიც 2008 წლის რუსეთ-საქართველოს ომის დროს ეთნიკური წმენდის, კაცობრიობის წინააღმდეგ ჩადენილი და ომის დანაშაულების მსხვერპლი გახდა, გამოძიებიდან ელოდება კონკრეტულ შედეგებს, რათა აღსრულდეს მართლმსაჯულება. ასევე, შეხვედრაზე აღინიშნა, რომ მხარეებს შორის თანამშრომლობა ძალიან მაღალ დონეზე ხორციელდება.

როგორც შეხვედრაზე პროკურორმა ფატუ ბენსუდამ განაცხადა, რუსეთ-საქართველოს ომის საქმეზე გამოძიება აქტიურ ფაზაშია და მისი, როგორც ჰააგის სასამართლოს პროკურორის უფლებამოსილების ვადის ამოწურვამდე, არ არის გამორიცხული, რომ აღნიშნულ საქმეზე კონკრეტული შედეგები დადგეს. ფატუ ბენსუდას უფლებამოსილების ვადა 2020 წლის ბოლოს ეწურება.

პროკურორ ბენსუდასთან შეხვედრამდე თეა წულუკიანი ჰააგის სასამართლოს წევრი სახელმწიფოების ასამბლეის თავმჯდომარეს, ო-გონ კვონს შეხვდა. მხარეებმა ასამბლეის საქმიანობაში საქართველოს მონაწილეობაზე და ჰააგის სასამართლოს მოსამართლედ საქართველოდან კანდიდატურის წარდგენაზე ისაუბრეს.

როგორც ცნობილია, ჰააგის სასამართლოს მოსამართლის არჩევნები 2020 წლის დეკემბერში გაიმართება, რომლის ფარგლებშიც სხვადასხვა რეგიონიდან ექვსი მოსამართლე უნდა აირჩეს. საქართველო მოსამართლეობის კანდიდატის წარდგენას აღმოსავლეთ ევროპის კვოტით აპირებს, ვინაიდან გაისად უფლებამოსილების ვადა ჩეხ მოსამართლეს გასდის.

იუსტიციის სამინისტროს ცნობით, პროკურორ ბენსუდასთან შეხვედრით ვიცე-პრემიერმა ჰააგაში ვიზიტი დაასრულა. ვიზიტის ფარგლებში თეა წულუკიანი შეხვდა სასამართლოს თავმჯდომარეს, განმწესრიგებელს, ჰააგის სასამართლოს წევრი სახელმწიფოების ასამბლეის თავმჯდომარეს და სიტყვით გამოვიდა პლენარულ სხდომაზე.

„საქართველოს დელეგაცია კი ასამბლეაზე აქტიურ მონაწილეობას განაგრძობს იუსტიციის მინისტრის მოადგილის, გოჩა ლორთქიფანიძის ხელმძღვანელობით, რომელიც პლენარულ სესიაზე სიტყვით 5 დეკემბერს გამოვა. პლენარულ სხდომებსა და სამუშაო ჯგუფებში საქართველოს სახელით აქტიურად მონაწილეობენ აგრეთვე იუსტიციის სამინისტროს საერთაშორისო სასამართლოებში სახელმწიფო წარმომადგენლობის დეპარტამენტის უფროსი ბექა ძამაშვილი, ნიდერლანდების სამეფოში საქართველოს საგანგებო და სრულუფლებიანი ელჩი გიორგი შარვაშიძე და საელჩოს სამართლებრივი მრჩეველი გიორგი ნაკაშიძე“, – აღნიშნულია საქართველოს იუსტიციის სამინისტროს ინფორმაციაში.

admin
ავტ.: admin დეკემბერი 4, 2019 10:08

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


37,521
ვიზიტორი
დღეში
Powered By Google Analytics