თბილისის 22-ე სკოლაში ნაღმის შესახებ ცრუ შეტყობინება საგანგებო სიტუაციების მართვის დეპარტამენტ 112-ში სავარაუდოდ ამავე სკოლის მოსწავლეებისგან შევიდა. პირველი არხის ინფორმაციით, 112-ში დაწყებითი სკოლის მოსწავლეებმა დარეკეს. მოგვიანებით ისინი საგანგებო სიტუაციების მართვის დეპარტამენტს კვლავ დაუკავშირდნენ და თქვეს, რომ იხუმრეს.
პირველი არხს შინაგან საქმეთა სამინისტროში განუცხადეს, რომ შეტყობინება 112-ში ნამდვილად შევიდა, ფაქტზე რეაგირება მოხდა და სამართალდამცველები ადგილზე გავიდნენ, თუმცა უწყებაში სხვა დეტალებს არ აკონკრეტებენ.
შსს-ს ცნობით, ფაქტზე დაწყებულია გამოძიება საქართველოს სისხლის სამართლის კოდექსის 331-ე მუხლით, რაც ტერორიზმის შესახებ ცრუ შეტყობინებას გულისხმობს.
მომხდარი ფაქტის გამო, თბილისის 22-ე საჯარო სკოლაში სასწავლო პროცესი დროებით შეწყვეტილი იყო.
